పోలింగ్‌ రోజు రాష్ట్ర సరిహద్దుల్లో భద్రత కట్టుదిట్టం

సీఈఓ ముకేశ్‌కుమార్‌ మీనా

ఈనాడు డిజిటల్‌, అమరావతి: సార్వత్రిక ఎన్నికల నేపథ్యంలో దొంగ ఓట్ల నియంత్రణకు పోలింగ్‌ రోజు రాష్ట్ర సరిహద్దుల వద్ద భద్రత కట్టుదిట్టం చేయనున్నట్లు రాష్ట్ర ప్రధాన ఎన్నికల అధికారి (సీఈఓ) ముకేశ్‌కుమార్‌ మీనా సోమవారం ‘ఈనాడు’కు తెలిపారు. ఇతర రాష్ట్రాల్లో ఓటు హక్కు ఉండి మళ్లీ ఇక్కడ వినియోగించుకోవాలనుకునే వారిని నియంత్రిస్తామన్నారు. ‘ఎన్నికల ప్రవర్తనా నియమావళి ప్రకారం పోలింగ్‌కు 48 గంటల ముందు స్థానికేతరులు ఆయా నియోజకవర్గాల నుంచి వెళ్లిపోవాలి. ఏపీతో సరిహద్దు పంచుకునే తెలంగాణతో సహా అన్ని రాష్ట్రాల తనిఖీ కేంద్రాల వద్ద నిఘా పెంచుతాం. రాష్ట్రానికి వచ్చే ప్రతీ వాహనాన్ని నిశితంగా పరిశీలించాకే రాష్ట్రంలోకి అనుమతిస్తాం’ అని మీనా పేర్కొన్నారు.