నిఘా విభాగాధిపతి పోస్టుకు సంజయ్‌ పేరు ఎలా ప్రతిపాదిస్తారు?

విస్మయం కలిగిస్తున్న సీఎస్‌ ప్రతిపాదనలు

ఈనాడు-అమరావతి: నిఘా విభాగాధిపతి పోస్టు కోసం ముగ్గురు అధికారుల పేర్లతో పంపిన ప్యానల్‌ జాబితాలో సీఐడీ విభాగాధిపతి ఎన్‌.సంజయ్‌ పేరును.. ప్రభుత్వ ప్రధాన కార్యదర్శి కె.ఎస్‌.జవహర్‌రెడ్డి చేర్చడంపై విమర్శలు వ్యక్తమవుతున్నాయి. వైకాపాతో అంటకాగుతూ, ఆ పార్టీకి మేలు కలిగించడం కోసం ఏకపక్షంగా పనిచేస్తున్నారనే ఫిర్యాదులపైనే నిఘా విభాగాధిపతి పీఎస్‌ఆర్‌ ఆంజనేయుల్ని ఎన్నికల సంఘం బదిలీ చేసింది. అలాంటి ఆరోపణలే ఉన్న సీఐడీ విభాగాధిపతి ఎన్‌.సంజయ్‌ పేరును ఈ ప్యానల్‌ జాబితాలో జవహర్‌రెడ్డి ప్రతిపాదించడం విస్మయం కలిగిస్తోంది.

వైకాపా చెప్పినదే చేస్తారని సంజయ్‌పై ఫిర్యాదులు

వైకాపా నాయకులు చెప్పిందే చట్టం.. వారి ఆదేశాలే శాసనం అన్నట్లుగా సంజయ్‌ పనిచేస్తారనే ఫిర్యాదులున్నాయి. తెదేపా అధినేత చంద్రబాబుపై నైపుణ్యాభివృద్ధి కేసు నమోదు చేసి, ఆయన్ను అరెస్టు చేసిన సమయంలో సంజయ్‌ అత్యుత్సాహం చూపిస్తూ.. రాజకీయ నాయకుడి మాదిరిగా ప్రకటనలిస్తూ, వ్యంగ్యంగా మాట్లాడారు. ఆంధ్రప్రదేశ్‌తోపాటు దిల్లీ, హైదరాబాద్‌ల్లో ప్రెస్‌మీట్లు పెట్టి వైకాపా ఎజెండాను భుజాలకెత్తుకుని మాట్లాడారన్న విమర్శలున్నాయి. కోర్టు పరిధిలో ఉన్న అంశంపై సర్వీసు, చట్ట నిబంధనలకు విరుద్ధంగా ఆయన మాట్లాడారంటూ తెదేపా అప్పట్లో ఫిర్యాదు చేసింది. అలాంటి ఫిర్యాదులు, విమర్శలూ ఉన్న అధికారి పేరును ఎన్నికల వేళ.. కీలకమైన నిఘా విభాగాధిపతి పోస్టు కోసం ఎలా ప్రతిపాదిస్తారు? అలాంటప్పుడు ఇదివరకు ఉన్న అధికారుల్ని బదిలీ చేసి ప్రయోజనమేంటి? ఇది ఈసీ కళ్లకు గంతలు కట్టడం కాదా?