కలెక్టర్, ఎస్పీల నియామకంపై ఈసీకి అధికారుల జాబితా

ఈనాడు, అమరావతి: కేంద్ర ఎన్నికల సంఘం సస్పెండ్‌ చేసిన పల్నాడు, అనంతపురం ఎస్పీలు, బదిలీ చేసిన తిరుపతి ఎస్పీ, పల్నాడు కలెక్టర్‌ల స్థానంలో కొత్తవారిని నియమించేందుకు రాష్ట్ర ప్రభుత్వ ప్రధాన కార్యదర్శి కేఎస్‌ జవహర్‌రెడ్డి కొందరు అధికారుల పేర్లతో ఈసీకి జాబితాలు పంపించారు. పల్నాడు కలెక్టర్‌ పోస్టుకు లట్కర్‌ శ్రీకేశ్‌ బాలాజీరావు, హరికిరణ్, వీరపాండ్యన్‌ల పేర్లు సూచించారు. ముగ్గురు ఎస్పీల కోసం తొమ్మిది పేర్లు పంపించాల్సి ఉండగా.. ఐదుగురి పేర్లు పంపించారు. వారిలో మల్లికాగర్గ్, గౌతమిషాలి, హర్షవర్ధన్‌రాజు, కె.శ్రీనివాసరావు, డి.నరసింహకిశోర్‌ల పేర్లు ఉన్నాయి. ఈసీ ఆదేశాల మేరకు పల్నాడు, అనంతపురం ఎస్పీలు బిందుమాధవ్, అమిత్‌ బర్దర్‌లను సస్పెండ్‌ చేస్తూ, పల్నాడు కలెక్టర్‌ శివశంకర్, తిరుపతి ఎస్పీ కృష్ణకాంత్‌ పటేల్‌లను బదిలీ చేస్తూ సీఎస్‌ శుక్రవారం ఉత్తర్వులు జారీ చేశారు.