Ramoji Rao: ఫొటోలో పొరపాటును చెబితే.. బీరువా బహూకరించారు

విలువలకు ప్రాణం పోసే వ్యక్తి రామోజీరావు

మార్గదర్శి చిట్‌ఫండ్‌ ద్వారా పాఠశాలకు అందజేసిన బీరువా 

జీలుగుమిల్లి, న్యూస్‌టుడే: విలువలకు ప్రాణం పోయడంలో అక్షర యోధుడు రామోజీరావుకు ఎవరూ సాటిరారని ఏలూరు జిల్లా జీలుగుమిల్లి మండలం వంకవారిగూడెం వాల్మీకి విజ్ఞాన కేంద్రం పాఠశాల ఏవో, విశ్వహిందూ పరిషత్‌ రాష్ట్ర కార్యదర్శి తనికెళ్ల సత్యరవికుమార్‌ అన్నారు. రామోజీరావు మృతి నేటి సమాజానికి తీరని లోటంటూ.. 1990లో జరిగిన చిన్న సంఘటనను ఆయన గుర్తు చేసుకున్నారు. అప్పట్లో మార్గదర్శిలో పొదుపు చేసిన సొమ్ముతో ఓ వ్యక్తి తన మనవరాలి వివాహం చేశారనే విషయాన్ని ఆదివారం సంచికలో ‘తరతరాల అనుబంధం’ శీర్షికన ప్రచురించారు. అయితే అందులో ఆయన తన మనవరాలిని ఎడమ చేతితో దీవిస్తున్నట్లుగా ఫొటో పొరపాటున తారుమారై ప్రచురితమవడంతో ఆ విషయాన్ని తాను లేఖ ద్వారా రామోజీరావు దృష్టికి తీసుకెళ్లినట్లు రవికుమార్‌ చెప్పారు. ‘ఉన్నత ప్రమాణాలు పాటించే ఆయన మరుసటి వారంలో ఆ పొరపాటును సవరిస్తూ.. కుడి చేతితో దీవిస్తున్నట్లుగా ఉన్న ఫొటోను సరిగా ప్రచురించడంతో పాటు నా సూచనను అభినందిస్తూ రూ. 1,116 చెక్‌ మార్గదర్శి చిట్‌ఫండ్‌ ద్వారా అందించారు. ధన రూపంలో బహుమతి వద్దని ఏలూరు మార్గదర్శి కార్యాలయానికి వెళ్లి విన్నవించగా, ‘తరతరాల అనుబంధం’ పేరుతో బీరువాను కొని మా పాఠశాలకు బహూకరించారు. అలాంటి మహోన్నత వ్యక్తులతో అనుబంధం ఎన్నటికీ మరువలేనిది’ అని ఆయన తెలిపారు.