Sundar Pichai: లేఆఫ్‌ల వేళ.. సుందర్‌ పిచాయ్‌కి ₹1850కోట్ల పారితోషికం

ఇంటర్నెట్‌ డెస్క్‌: గూగుల్‌ (Google) మాతృ సంస్థ ఆల్ఫాబెట్‌ (Alphabet) సీఈఓ సుందర్‌ పిచాయ్‌ (Sundar Pichai) 2022 సంవత్సరానికి గానూ 226 మిలియన్‌ డాలర్ల (భారత కరెన్సీలో దాదాపు రూ.1850కోట్లకు పైమాటే) పారితోషికం అందుకున్నారు. ఈ మేరకు కంపెనీ రెగ్యులేటరీ ఫైలింగ్‌లో వెల్లడించింది. కంపెనీలో సగటు ఉద్యోగి వేతనంతో పోల్చితే.. ఇది 800 రెట్లు ఎక్కువగా ఉండటం గమనార్హం. ఇక, ఈ పారితోషికంలో 218 మిలియన్‌ డాలర్ల విలువైన స్టాక్ అవార్డులు ఉన్నాయి.

మూడేళ్ల కాలానికి సుందర్‌ పిచాయ్‌ (Sundar Pichai) ఈ స్టాక్‌ అవార్డును అందుకున్నారు. 2019లోనూ ఆయన ఇదే స్థాయిలో ప్యాకేజీ తీసుకున్నారు. ఆ ఏడాది స్టాక్‌ అవార్డుల రూపంలో ఆయనకు 281 మిలియన్‌ డాలర్ల పారితోషికం అందింది. ఇక, గత మూడేళ్లుగా పిచాయ్‌ స్థిరంగా 2 మిలియన్‌ డాలర్ల వార్షిక వేతనం అందుకుంటున్నట్లు కంపెనీ తెలిపింది.

అయితే, ఆర్థిక మాంద్యం భయాలతో గూగుల్‌ (Google)లో పెద్ద సంఖ్యలో లేఆఫ్‌లు చేపడుతున్న వేళ.. పిచాయ్‌ ఈ స్థాయిలో పారితోషికం అందుకోవడం చర్చనీయాంశంగా మారింది. ఖర్చు నియంత్రణలో భాగంగా 12వేల మంది ఉద్యోగులను తొలగిస్తున్నట్లు ఆల్ఫాబెట్‌ (Alphabet) ఈ ఏడాది జనవరిలో ప్రకటించిన విషయం తెలిసిందే. ప్రపంచవ్యాప్తంగా సంస్థలో ఉన్న మొత్తం ఉద్యోగుల్లో ఇది 6 శాతం కావడం గమనార్హం. దీంతో ఉద్యోగులు నిరసన బాటపట్టారు. ఈ నెల ఆరంభంలో లండన్‌ కార్యాలయం నుంచి గూగుల్‌ (Google) ఉద్యోగులు వాకౌట్‌ చేశారు. అంతకుముందు మార్చిలో కంపెనీకి చెందిన జ్యూరిచ్‌ ఆఫీసుల్లోనూ ఉద్యోగులు నిరసన ప్రదర్శించారు.