హోండా కార్ల ధరలూ పెరుగుతాయ్‌

దిల్లీ: జనవరి నుంచి తమ కార్ల ధరలను పెంచనున్నట్లు హోండా కార్స్‌ ఇండియా తెలిపింది. పెరిగిన తయారీ వ్యయాల భారాన్ని కంపెనీపై తగ్గించేందుకే ఈ నిర్ణయం తీసుకున్నట్లు సంస్థ ఉపాధ్యక్షుడు (మార్కెటింగ్‌, విక్రయాలు) కునాల్‌ బెల్‌ వివరించారు. ప్రస్తుతం ఎలివేట్‌, సిటీ, అమేజ్‌ మోడల్‌ కార్లను సంస్థ దేశీయంగా విక్రయిస్తోంది. ఏ మోడల్‌ ధర ఎంత పెంచాలన్నది ఈ నెలాఖరున ఖరారు చేస్తామని కునాల్‌ బెల్‌ పేర్కొన్నారు. ఇటీవల ప్రవేశపెట్టిన ఎలివేట్‌కు ప్రకటించిన ప్రత్యేక ధర ఈనెల 23 వరకే వర్తిస్తుందని, జనవరి నుంచి కొత్త ధరలే ఈ కారుకూ వర్తిస్తాయని వివరించారు.