వివో కేసులో తొలి ఛార్జిషీట్‌ దాఖలు

దిల్లీ: చైనాకు చెందిన స్మార్ట్‌ఫోన్‌ కంపెనీ వివో అనుబంధ సంస్థ వివో ఇండియాపై, మనీలాండరింగ్‌ నిరోధక చట్టం కింద ఎన్‌ఫోర్స్‌మెంట్‌ డైరెక్టరేట్‌ (ఈడీ) ఛార్జిషీట్‌ దాఖలు చేసింది. వివోతో పాటు మరికొందరిపై వచ్చిన మనీలాండరింగ్‌ ఆరోపణలపై దర్యాప్తు చేసిన ఈడీ, తొలి ఛార్జిషీట్‌ను ప్రత్యేక కోర్టులో వేసింది. మనీలాండరింగ్‌ నిరోధక చట్టంలోని పలు సెక్షన్ల కింద వివో ఇండియాపై అభియోగాలు మోపింది. గతేడాది జులైలో వివో కార్యాలయాలు సహా సంబంధిత వ్యక్తుల నివాసాల్లో ఈడీ సోదాలు నిర్వహించింది. దేశంలో పన్ను ఎగవేత కోసం రూ.62,476 కోట్లను భారత్‌ నుంచి చైనాకు అక్రమంగా ఈ సంస్థ బదిలీ చేసిందన్నది ఈడీ ఆరోపణ. ఈ కేసులో లావా ఇంటర్నేషనల్‌ ఎండీ హరి ఓం రాయ్‌తో పాటు చైనాకు చెందిన గ్వాంగ్వెన్‌ అలియాస్‌ ఆండ్రూ కువాంగ్‌, సీఏలు నితిన్‌ గార్గ్‌, రాజన్‌ మాలిక్‌ను ఈడీ అదుపులోకి తీసుకుంది. దేశంలో ఆర్థిక సార్వభౌమత్వాన్ని దెబ్బ తీసే కుట్రగా ఈ ఘటనను ఈడీ అభివర్ణించింది.