అంతర్జాతీయ సంకేతాలే కీలకం

ఆర్‌బీఐ పరపతి విధాన సమీక్ష నిర్ణయాలు కూడా
వాహన, ఔషధ షేర్లకు సానుకూలతలు
విశ్లేషకుల అంచనాలు
స్టాక్‌ మార్కెట్‌
ఈ వారం

అంతర్జాతీయ సంకేతాలకు అనుగుణంగా దేశీయ మార్కెట్లు కదలాడొచ్చని విశ్లేషకులు అంటున్నారు. దేశీయంగా చూస్తే.. రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) పరపతి విధాన సమీక్ష (ఏప్రిల్‌ 3-5) నిర్ణయాలపైనా మదుపర్లు దృష్టి సారించొచ్చు. అమెరికా ఫెడరల్‌ రిజర్వ్‌ ఛైర్మన్‌ ప్రసంగ (ఏప్రిల్‌ 3) అంశాలూ గమనించాలి. నిఫ్టీ-50 తన జీవనకాల గరిష్ఠ స్థాయి అయిన 22,526.60ను పరీక్షించొచ్చని సాంకేతిక నిపుణులు అంటున్నారు. కార్పొరేట్‌ సంస్థల ఫలితాల సీజను ప్రారంభం కానున్న నేపథ్యంలో మదుపర్లు అప్రమత్తంగా ఉండొచ్చని భావిస్తున్నారు.  వివిధ రంగాలపై విశ్లేషకులు ఏమంటున్నారంటే..

• చమురు కంపెనీల షేర్లు కొత్త ఆర్థిక సంవత్సరాన్ని సానుకూలంగా మొదలుపెట్టొచ్చు. అయితే పరిమిత లాభాలకే అవకాశం ఉంది. సెప్టెంబరు కల్లా ముడిచమురు బ్యారెల్‌ ధర 100 డాలర్లకు చేరొచ్చని జేపీ మోర్గాన్‌ పేర్కొన్న నేపథ్యంలో, మదుపర్లు పెట్రో ధరలను గమనించాలి.
• మార్చినెల విక్రయ గణాంకాలు బాగుంటాయన్న అంచనాల మధ్య వాహన కంపెనీల షేర్లు సానుకూల ధోరణితో ట్రేడ్‌ కావొచ్చు. వాహన సూచీకి 21,000 వద్ద మద్దతు; 22,000 వద్ద నిరోధం ఏర్పడొచ్చు.
• నిఫ్టీ బ్యాంక్‌ ఈ వారమూ రాణించొచ్చు. 45,500 వద్ద మద్దతు, 48,500 వద్ద నిరోధం అంచనా వేస్తున్నారు. ఒక వేళ 48,500 స్థాయిని అధిగమిస్తే 49,500-50,000కు చేరొచ్చు. ఐసీఐసీఐ బ్యాంక్‌, హెచ్‌డీఎఫ్‌సీ బ్యాంక్‌, ఎస్‌బీఐలను పరిశీలించొచ్చు.
• ఎఫ్‌ఎమ్‌సీజీ కంపెనీల షేర్లు మార్కెట్‌తో పాటే చలించొచ్చు. ముడిపదార్థాల ధరలు తగ్గుతుండడం కలిసిరావొచ్చు. అయితే బలహీన గ్రామీణ గిరాకీ వెనక్కి లాగొచ్చు. రాడికో ఖైతాన్‌, కోల్గేట్‌, గోద్రేజ్‌ కన్జూమర్‌   8-10% వరకు లాభాలందిచొచ్చని ఓ బ్రోకరేజీ అంచనా.
• సిమెంటు షేర్లు ఒక శ్రేణికి లోబడి ట్రేడవవచ్చు. ఎన్నికల కోడ్‌ కారణంగా గిరాకీ కాస్త నెమ్మదించడం ఇందుకు కారణం. ధరలూ స్తబ్దుగానే ఉన్నాయి. సాగర్‌ సిమెంట్స్‌ రేటింగ్‌ ను ఓ బ్రోకరేజీ సంస్థ  ‘కొనుగోలు’కు సవరించింది.
• యంత్ర పరికరాల కంపెనీల షేర్లు ఇప్పటికే అధిక ధరల వద్ద ఉండడంతో విక్రయాల ఒత్తిడికి గురికావొచ్చు. ఏప్రిల్‌-జూన్‌లో ప్రభుత్వ ఆర్డర్లు సైతం తగ్గొచ్చు. అయితే మధ్యకాలానికి ఈ రంగంపై విశ్లేషకులు ‘బులిష్‌’గా ఉన్నారు. ఏబీబీ ఇండియా లక్ష్యం ధరను రూ.7,550కు యూబీఎస్‌ పెంచింది.
• అమెరికా మార్కెట్లో బలమైన విక్రయాల మధ్య ఔషధ కంపెనీల షేర్లు లాభాలను పెంచుకోవచ్చు. దేశీయ మార్కెట్‌పై ఆధారపడ్డ షేర్లు నెమ్మదిగా పెరిగినా.. బలమైన రికవరీని చూడగలవని అంచనా.
• ఐటీ కంపెనీల షేర్లు ఒత్తిడిలోనే కొనసాగొచ్చు. గిరాకీ స్తబ్దత, బలహీన స్థూల ఆర్థిక వాతావరణం వల్ల స్వల్పకాలంలో మదుపర్లు ఈ షేర్ల కొనుగోలు విషయంలో దూకుడుగా వ్యవహరించకపోవచ్చు. ఇన్ఫోసిస్‌, టీసీఎస్‌ బలంగా పుంజుకునే అవకాశాలు కనిపిస్తున్నాయి.
• లోహ కంపెనీల షేర్లకు అంతర్జాతీయ సంకేతాలు కలసిరావొచ్చు. ‘పడ్డపుడల్లా కొనుగోలు’ చేసే వ్యూహాన్ని మదుపర్లు అనుసరించడం మేలు. హిందాల్కో, సెయిల్‌ షేర్లను పరిశీలించొచ్చు.