విద్యుత్‌ వాహనాలకు రాయితీ ఇలా

4 నెలలకు రూ.500 కోట్లు కేటాయింపు
అమల్లోకి ఈఎంపీఎస్‌ 2024

ఈనాడు, హైదరాబాద్‌: దేశంలో విద్యుత్‌ వాహనాల (ఈవీ) వినియోగాన్ని పెంచేందుకు ప్రస్తుత ఆర్థిక సంవత్సరం తొలి 4 నెలలకు ప్రకటించిన ఎలక్ట్రిక్‌ మొబిలిటీ ప్రమోషన్‌ స్కీం (ఈఎంపీఎస్‌ 2024) అమలు ప్రారంభమైంది. ఈ నెల 1 నుంచి జులై 31 వరకు ఈ కొత్త పథకం అమల్లో ఉంటుంది. రాయితీల కోసం రూ.500 కోట్లు కేటాయించారు. ఈ నిధులు కేటాయిస్తూ, దాదాపు 3.72 లక్షల ఈవీల కొనుగోలును ప్రోత్సహించాలని ప్రభుత్వం భావిస్తోంది. విద్యుత్తు వాహనాల తయారీ, వినియోగాన్ని పెంచేందుకు తీసుకొచ్చిన ఫేమ్‌ రెండో దశ పథకం గడువు మార్చి 31తో ముగిసినందున, దీనికి కొనసాగింపుగా ఈ కొత్త పథకాన్ని ప్రభుత్వం తీసుకొచ్చింది.

ఈ వాహనాలన్నింటికీ: విద్యుత్‌ ద్విచక్ర వాహనాలు, ఆటోలు, ఇ-రిక్షాలు, ఇ-కార్ట్‌లకు ఈ పథకం వర్తిస్తుందని భారీ పరిశ్రమల మంత్రిత్వ శాఖ వెల్లడించింది. పర్యావరణ అనుకూల వాహనాలను ప్రజలకు సరసమైన ధరలకు అందించేందుకు ఈ పథకాన్ని ఉద్దేశించినట్లు పేర్కొంది. ప్రధానంగా వాణిజ్య ప్రయోజనాల కోసం నమోదు చేసుకున్న విద్యుత్‌ ద్విచక్ర వాహనాలు, విద్యుత్‌ త్రిచక్ర వాహనాలకు ఇది వర్తిస్తుందని తెలిపింది. దీనితోపాటు, ప్రైవేట్‌ లేదా కార్పొరేట్‌ యాజమాన్యంలో నమోదైన ఇ-ద్విచక్ర వాహనాలకూ రాయితీ లభిస్తుందని పేర్కొంది.

రూ.10-50 వేల వరకు: విద్యుత్‌ ద్విచక్ర వాహనాల కొనుగోలు కోసం రూ.10,000 వరకు ప్రోత్సాహకం లభించనుంది. ఇ-రిక్షాలు, ఇ-కార్ట్‌ల వంటి వాటికి రూ.25,000 వరకు అందుతుంది. ఎల్‌5 విభాగం కిందకు వచ్చే పెద్ద 3 చక్రాల ఈవీలను కొనుగోలు చేసేందుకు రూ.50,000 వరకు రాయితీ లభిస్తుంది.

ఈ పథకం కింద మొత్తం 3,72,215 విద్యుత్‌ వాహనాలకు ప్రయోజనం లభించనుంది. ఇందులో ద్విచక్ర వాహనాలు 3.33 లక్షలు, ఇ-త్రీవీలర్స్‌ 38,828, ఇ-రిక్షాలు 13,590, ఎల్‌5 వాహనాలు 25,238 ఉండనున్నాయి. అధునాతన బ్యాటరీలు అమర్చిన వాహనాలకు మాత్రమే ప్రోత్సాహకాల ప్రయోజనాలు వర్తిస్తాయని ప్రభుత్వం స్పష్టం చేసింది.