అందుబాటు ధర ఇళ్ల వాటా తగ్గుతోంది

మొత్తం అమ్మకాల్లో ఇవి 22 శాతమే
రూ.కోటి పైన ఇళ్లకు గిరాకీ
2024 జనవరి-మార్చిపై ప్రాప్‌ టైగర్‌ నివేదిక

దిల్లీ: దేశంలోని 8 ప్రధాన నగరాల్లో అమ్ముడవుతున్న నివాసాల్లో, రూ.45 లక్షల వరకు పలికే అందుబాటు ధర ఇళ్ల వాటా తగ్గుతోంది. ఈ ఏడాది జనవరి-మార్చి అమ్మకాల్లో ఈ విభాగ వాటా 22 శాతమేనని హౌసింగ్‌ బ్రోకరేజీ సంస్థ ప్రాప్‌ టైగర్‌ తాజా నివేదిక వెల్లడించింది. ఇదే సమయంలో విలాస ఫ్లాట్లకు గిరాకీ పెరుగుతోందని తెలిపింది. 2023 జనవరి-మార్చిలో, మొత్తం నివాస విక్రయాల్లో అందుబాటు ధర ఇళ్ల వాటా 48% కాగా, ఈసారి సగానికి తగ్గి 22 శాతానికి పరిమితమైంది. ఈ 8 నగరాల్లో మొత్తం ఇళ్లు/ఫ్లాట్లు 85,840 మేర 2023 జనవరి-మార్చిలో విక్రయం కాగా, ఈ ఏడాది ఇదే కాలంలో 41% అధింగా 1,20,640 అమ్ముడయ్యాయి.

• మొత్తం ఇళ్ల విక్రయాల్లో రూ.25 లక్షల కంటే తక్కువ ధర కలిగిన విభాగ వాటా 5 శాతంగా నమోదైంది. గత ఏడాది ఇది 15 శాతంగా ఉంది.
•  రూ.25-45 లక్షల మధ్య ఇళ్ల వాటా 23% నుంచి 17 శాతానికి తగ్గింది.
• కొవిడ్‌ పరిణామాల తర్వాత నిర్మాణ వ్యయం పెరిగినా, పెద్ద ఇళ్ల కొనుగోలుకే వినియోగదార్లు మొగ్గుచూపుతున్నారని ‘రియల్‌ ఇన్‌సైట్‌ రెసిడెన్షియల్‌ జనవరి-మార్చి 2024’ త్రైమాసిక నివేదికలో ప్రాప్‌ టైగర్‌ వెల్లడించింది.
• మొత్తం అమ్మకాల్లో రూ.1 కోటి అంతకంటే ఎక్కువ ధర కలిగిన ఇళ్లు/ఫ్లాట్ల వాటా గత ఏడాది జనవరి-మార్చిలో 24% కాగా, ఈ ఏడాది 37 శాతానికి చేరింది.
• రూ.45-75 లక్షల విలువైన ఇళ్ల వాటా మార్పు లేకుండా 26 శాతంగా ఉంది. రూ.75 లక్షలు-రూ.1 కోటి ఇళ్ల వాటా 12% నుంచి 15 శాతానికి పెరిగింది.
• హైదరాబాద్‌, అహ్మదాబాద్‌, బెంగళూరు, చెన్నై, దిల్లీ-ఎన్‌సీఆర్‌,  కోల్‌కతా, ముంబయి మెట్రోపాలిటన్‌ రీజియన్‌ (ఎంఎంఆర్‌), పుణెల్లో ఇళ్ల విక్రయాల ఆధారంగా ఈ నివేదికను ప్రాప్‌ టైగర్‌ రూపొందించింది. దిల్లీ-ఎన్‌సీఆర్‌లో ఘజియాబాద్‌, ఫరీదాబాద్‌, గ్రేటర్‌ నోయిడా, గురుగ్రామ్‌ కలిసి ఉంటాయి. ఎంఎంఆర్‌లో ముంబయి, థానే, నవీ ముంబయి కలిసి ఉంటాయి.
• విలువ పరంగా ఇళ్ల విక్రయాల విలువ 2023 జనవరి-మార్చిలో రూ.66,155 కోట్లు కాగా, ఈ ఏడాది ఇదే కాలంలో ఈ మొత్తం రూ.1,10,880 కోట్లకు చేరింది. చదరపు అడుగుల ప్రకారం, గృహ విక్రయాలు 99 మిలియన్‌ చదరపు అడుగుల నుంచి 63% పెరిగి 162 మి.చ.అ.కు చేరాయి.