పెద్ద ఆర్డర్ల డెలివరీకి జొమాటో ప్రత్యేక వాహనం

దిల్లీ: 50 మంది వరకు స్నేహితులు/ కుటుంబ సభ్యులు/ సహోద్యోగులతో జరుపుకునే వేడుకలు, ఫంక్షన్లు, కార్యక్రమాల కోసం ఆహార పదార్థాలను డెలివరీ చేస్తామని జొమాటో తెలిపింది. ఇందుకోసం ప్రత్యేక వాహనాలను సంస్థ ప్రారంభించింది. ఇవి అన్నీ విద్యుత్తు వాహనాలు అని కంపెనీ తెలిపింది. పెద్ద ఆర్డర్లకు సంబంధించి ఈ తరహా వాహనాలను ఉపయోగిస్తుండటం దేశంలో ఇదే మొదటిసారి అని జొమాటో సీఈఓ దీపిందర్‌ గోయల్‌ తెలిపారు. ఇంతకుముందు పెద్ద ఆర్డర్లు తీసుకున్నా, సంప్రదాయ డెలివరీ భాగస్వాములే అందించేవాళ్లు అని తెలిపారు. దీని వల్ల వినియోగదారుకు ఆశించిన స్థాయిలో అనుభూతి ఉండేది కాదని పేర్కొన్నారు. కొత్త వాహనాల వల్ల మరింత సౌకర్యంగా ఉంటుందని వెల్లడించారు. కూలింగ్‌ కంపార్ట్‌మెంట్‌లు, హాట్‌ బాక్స్‌ల వంటివి ఏర్పాటు చేయడం ద్వారా వినియోగదార్లు కోరుకున్న రీతిలో ఆహార పదార్థాలను డెలివరీ చేయాలన్నది తమ ఉద్దేశమని పేర్కొన్నారు.