యాపిల్‌ 5 లక్షల ఉద్యోగాలు!

దిల్లీ: వచ్చే మూడేళ్లలో భారత్‌లో వెండర్‌ల ద్వారా 5 లక్షలకు పైగా ఉద్యోగాలను ఐఫోన్‌ తయారీ సంస్థ యాపిల్‌ సృష్టించే అవకాశం ఉందని ప్రభుత్వ వర్గాలు తెలిపాయి. ప్రస్తుతం యాపిల్‌ వెండర్‌లు, సరఫరాదార్లు భారత్‌లో 1.5 లక్షల మందికి ఉపాధి కల్పిస్తున్నారు. యాపిల్‌ కోసం రెండు ప్లాంట్‌లను నిర్వహిస్తున్న టాటా ఎలక్ట్రానిక్స్‌, అత్యధికంగా ఉద్యోగాలు ఇస్తోంది. ప్రభుత్వ వర్గాల అంచనాలపై స్పందించేందుకు యాపిల్‌ నిరాకరించింది. వచ్చే 4-5 ఏళ్లలో భారత్‌లో ఉత్పత్తిని అయిదు రెట్లు పెంచి 40 బిలియన్‌ డాలర్లు (దాదాపు రూ.3.32 లక్షల కోట్లు) చేయాలని యాపిల్‌ ప్రణాళికలు వేస్తోంది. కౌంటర్‌పాయింట్‌ రీసెర్చ్‌ ప్రకారం.. 2023లో అత్యధిక ఆదాయంతో, భారత విపణిలో యాపిల్‌ ఆధిపత్యం చెలాయించింది. ఫోన్ల సంఖ్యా పరంగా శామ్‌సంగ్‌ అగ్రస్థానంలో నిలిచింది.