ఫ్లిప్‌కార్ట్‌లో వాటా కొనుగోలుకు గూగుల్‌ రూ.2,900 కోట్ల పెట్టుబడి!

దిల్లీ: వాల్‌మార్ట్‌ గ్రూపునకు చెందిన ఇ-కామర్స్‌ సంస్థ ఫ్లిప్‌కార్ట్‌లో స్వల్ప వాటా కొనుగోలు చేసేందుకు గూగుల్‌ 350 మిలియన్‌ డాలర్లు (సుమారు రూ.2,900 కోట్లు) పెట్టుబడి పెట్టేందుకు ప్రతిపాదించింది. ఫ్లిప్‌కార్ట్‌ ప్రస్తుతం 1 బిలియన్‌ డాలర్ల (సుమారు రూ.8300 కోట్ల) నిధులను సమీకరించే ప్రక్రియలో ఉంది. ఇందులో 600 మిలియన్‌ డాలర్ల (సుమారు రూ.5,000 కోట్ల)ను మాతృసంస్థ వాల్‌మార్ట్‌ నుంచి పొందిందని విశ్వసనీయ వర్గాలు వెల్లడించాయి. సంస్థ విలువను 35 బిలియన్‌ డాలర్లు (సుమారు రూ.2.90 లక్షల కోట్లు)గా పరిగణించి, ఈ నిధుల సమీకరణను ఫ్లిప్‌కార్ట్‌ చేపడుతోంది. దీనికి నియంత్రణ పరమైన, ఇతర అవసరమైన అనుమతులు లభించాల్సి ఉంటుంద’ని ఫ్లిప్‌కార్ట్‌ తెలిపింది.