ఏప్రిల్‌లో ఆర్‌బీఐ పసిడి కొనుగోళ్లు 5.6 టన్నులు

ముంబయి: రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) ఈ ఏడాది ఏప్రిల్‌లో 5.6 టన్నుల పసిడి కొనుగోలు చేయడంతో, మొత్తం పసిడి నిల్వలు 827.7 టన్నులకు చేరాయని ప్రపంచ స్వర్ణ మండలి (డబ్ల్యూజీసీ) వెల్లడించింది. వివిధ దేశాల కేంద్ర బ్యాంకులన్నీ కలిపి ఏప్రిల్‌లో 33 టన్నుల పసిడి నిల్వలను జత చేసుకున్నాయని పేర్కొంది. మార్చిలో ఇవి నికరంగా 3 టన్నులే ఉన్నాయి. మన దేశ కేంద్ర బ్యాంక్‌ అయిన ఆర్‌బీఐ, ఈ ఏడాది జనవరి-మార్చిలో 24.1 టన్నుల పసిడిని కొనుగోలు చేసింది. గతంలో ఎన్నడూ ఇంతగా కొనలేదు. ప్రపంచంలో అత్యధికంగా పసిడి నిల్వలు ఉన్న దేశాల్లో అధికారికంగా భారత్‌ 10వ స్థానంలో ఉంది.