4వ అతిపెద్ద పునరుత్పాదక ఇంధన ఉత్పత్తిదారుగా భారత్‌

కేంద్ర మంత్రి ప్రహ్లాద్‌ జోషి

దిల్లీ: పునరుత్పాదక ఇంధన సామర్థ్యాల పరంగా.. 257 గిగావాట్‌తో ప్రపంచంలో నాలుగో అతిపెద్ద దేశంగా భారత్‌ ఉందని కేంద్ర మంత్రి ప్రహ్లాద్‌ జోషి పేర్కొన్నారు. 2014లో ఉన్న 81 గిగావాట్‌ సామర్థ్యం నుంచి మూడింతల వృద్ధి సాధించామన్నారు. ఇంటర్నేషనల్‌ సోలార్‌ అలయన్స్‌ అసెంబ్లీ 8వ సెషన్‌లో ఆయన ప్రసంగించారు. భారత సౌర విద్యుత్‌ సామర్థ్యం 2014లో 2.8 గిగావాట్‌ నుంచి ప్రస్తుతం 128 గిగావాట్‌కు చేరిందని వెల్లడించారు. సోలార్‌ మాడ్యుల్‌ తయారీ సామర్థ్యం కూడా 2 గిగావాట్‌ నుంచి 110 గిగావాట్‌కు, సోలార్‌ సెల్స్‌ తయారీ సున్నా నుంచి 27 గిగావాట్‌కు వృద్ధి చెందాయని పేర్కొన్నారు. ప్రధాన మంత్రి నరేంద్ర మోదీ నాయకత్వంలో శిలాజేతర వనరుల నుంచి 50% ఇంధన సామర్థ్యాలను సాధించాలన్న లక్ష్యాన్ని గడువు కంటే అయిదేళ్ల కంటే ముందుగానే మనం దేశం సాధించిందని స్పష్టం చేశారు.

సోలార్, సోలార్‌-బ్యాటరీ, గ్రీన్‌ అమ్మోనియా వంటి వాటిని చూస్తే.. భారత్‌లో పునరుత్పాదక సుంకాలు ప్రపంచంలోనే అత్యల్పంగా ఉన్నాయని అన్నారు. ప్రపంచంలో రెండో అతిపెద్ద పునరుత్పాదక ఇంధన మార్కెట్‌గా భారత్‌ నిలుస్తుందని ఇంటర్నేషనల్‌ ఎనర్జీ ఏజెన్సీ అంచనా వేసిన విషయాన్ని జోషి గుర్తు చేశారు.