రూ.4,589 పెట్టుబడిపై అయిదేళ్లలో రూ.7,609 లాభం

2020-21 పసిడి బాండ్లపై 166% ప్రతిఫలం

రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) పసిడి బాండ్లలో పెట్టుబడులు పెట్టిన మదుపర్లకు భారీ ప్రతిఫలం లభిస్తోంది. 2020 అక్టోబరు 28న జారీ చేసిన సార్వభౌమ పసిడి బాండ్ల (ఎస్‌జీబీ)పై 166% లాభం రానుంది. ఎస్‌జీబీ 2020-21 సిరీస్‌-1 బాండ్ల కాలావధి 8 ఏళ్లు అయినా, అయిదేళ్లకు ముందస్తు రిడెమ్షన్‌ చేసుకోవచ్చు కనుక, ఇందుకు ధరను ఆర్‌బీఐ ప్రకటించింది. ఈ బాండ్లు కలిగినవారు 2025 అక్టోబరు 28 నుంచి రిడెమ్షన్‌ చేసుకోవచ్చు. ఇందుకోసం మేలిమి బంగారం గ్రాము ధరను రూ.12,198గా నిర్ణయించింది. గత 3 వ్యాపార దినాల (ఈనెల 23, 24, 27)లో ముగింపు ధరల సగటు ఆధారంగా దీనిని నిర్ణయించారు. ఈ సిరీస్‌ బాండ్లను  జారీ చేసినపుడు దరఖాస్తు చేసుకున్న మదుపర్లు ఒక్కో గ్రాముకు ఆన్‌లైన్‌లో రూ.4,589, ఆఫ్‌లైన్‌లో రూ.4,639 చొప్పున చెల్లించారు. అంటే ఒక్కో గ్రాముపై రూ.7,609 ప్రతిఫలం (166%) పొందారన్నమాట.