రాణించిన కాగ్నిజెంట్‌

జులై-సెప్టెంబరులో అంచనాలకు మించి ఆదాయం

దిల్లీ: అమెరికా కేంద్రంగా కార్యకలాపాలు సాగించే దిగ్గజ ఐటీ సంస్థ కాగ్నిజెంట్, జులై- సెప్టెంబరు త్రైమాసికానికి అంచనా (5.27-  5.35 బి.డా.)కు మించి ఆదాయాన్ని ప్రకటించింది. సంస్థ ఆదాయం 5.415 బిలియన్‌ డాలర్లుగా నమోదైంది. 2024లో ఇదే త్రైమాసిక ఆదాయం 5.044 బిలియన్‌ డాలర్ల కంటే ఇది 7.3% ఎక్కువ. అయితే ఆదాయపు పన్ను  390 మిలియన్‌ డాలర్లు చెల్లించడం వల్ల, నికర లాభం 53% తగ్గి 274 మి.డా.కు చేరింది.

పూర్తి సంవత్సరానికి అంచనాలు పెంపు

2025 ఆర్థిక సంవత్సరానికి ఆదాయ అంచనాలను 20.7- 21.1 బి.డాలర్ల నుంచి 21.05- 21.10 బి.డాలర్లకు కంపెనీ పెంచింది. 

• ఈ ఏడాదిలో మొత్తంగా 15,000-20,000 మంది ఫ్రెషర్లను (తాజా ఉత్తీర్ణులను) నియమించుకోవాలన్నది కంపెనీ ప్రణాళిక. జులై- సెప్టెంబరులో నియమించుకున్న 6,000 మందిలోనూ ఎక్కువ మంది ఫ్రెషర్లేనని తెలిపింది. 
• హెచ్‌1బీ వీసాలపై ఆధారపడటాన్ని గణనీయంగా తగ్గించుకున్నామని, అమెరికాలో స్థానిక నియామకాలు పెంచుతున్నామని కంపెనీ పేర్కొంది. అందువల్ల హెచ్‌1బీ కొత్త వీసాకు రుసుం పెంచినా ప్రభావం పడబోదని తెలిపింది. 
• భారత విభాగాన్ని స్టాక్‌ ఎక్స్ఛేంజీల్లో నమోదు చేసే అంశాన్నీ పరిశీలిస్తున్నట్లు సంస్థ తెలిపింది.