GCG shares: బీసీజీ షేర్ల ట్రేడింగ్‌పై జూన్‌ 14 నుంచి సస్పెన్షన్‌

స్టాక్‌ ఎక్స్ఛేంజీల నిర్ణయం

ఈనాడు, హైదరాబాద్‌: బీసీజీ (బ్రైట్‌కామ్‌ గ్రూపు) సంస్థకు స్టాక్‌ ఎక్స్ఛేంజీల్లో పెద్ద ఎదురుదెబ్బ తగిలింది. ఈ కంపెనీ షేర్ల ట్రేడింగ్‌పై బీఎస్‌ఈ, ఎన్‌ఎన్‌సీ సస్పెన్షన్‌ విధించాయి. జూన్‌ 14 నుంచి ఇది అమల్లోకి వస్తుంది. ‘గత ఆర్థిక సంవత్సరం 2, 3 త్రైమాసికాల ఆర్థిక ఫలితాలను బ్రైట్‌కామ్‌ గ్రూపు, స్టాక్‌ ఎక్స్ఛేంజీలకు సమర్పించనందునే ఈ చర్య తీసుకోవాల్సి వచ్చింద’ని ఎన్‌ఎస్‌ఈ పేర్కొంది. దీని ప్రకారం 2 వారాల పాటు స్టాక్‌ ఎక్స్ఛేంజీల్లో బీసీజీ షేర్ల ట్రేడింగ్‌ పూర్తిగా నిలిచిపోతుంది. ఆ తర్వాత ప్రతి వారంలో మొదటి రోజైన సోమవారం ట్రేడింగ్‌కు అవకాశం ఇస్తారు. ఈ విధానం 6 నెలల పాటు అమల్లో ఉంటుంది. ఆ తర్వాత పరిస్థితిని సమీక్షించి తదుపరి నిర్ణయం తీసుకుంటారు. అన్ని నిబంధనలను కంపెనీ పాటించిన పక్షంలో, ప్రతి రోజూ షేర్ల ట్రేడింగ్‌కు అవకాశం లభిస్తుంది. లేని పక్షంలో ట్రేడింగ్‌పై ఆంక్షలు కొనసాగే అవకాశం ఉంటుంది.

గత ఏడాది నుంచే చర్యలు: గత ఏడాదిలో బీసీజీపై సెబీ కొన్ని చర్యలు తీసుకుంది. ప్రమోటర్ల షేర్లను ఫ్రీజ్‌ చేయడం, బోర్డులో మార్పులు చేయాలని నిర్దేశించడం, ఖాతాలను తిరిగి పరిశీలించి, సరిదిద్దాలని సూచించడం.. వంటివి ఇందులో ఉన్నాయి. ఇప్పుడు కొత్తగా షేర్ల ట్రేడింగ్‌పై సస్పెన్షన్‌ అమల్లోకి వచ్చింది. ఈ పరిస్థితులు ఈ కంపెనీ వాటాదార్లకు ఇబ్బందికరంగా మారాయి. దీనికి యాజమాన్యం పూర్తి బాధ్యత వహించాలని వాటాదార్లు స్పష్టం చేస్తున్నారు. ఈ కంపెనీల్లో ప్రమోటర్లకు 18.38% వాటా మాత్రమే ఉంది. అదే సమయంలో రిటైల్‌ మదుపరులకు 37.89% వాటా ఉంది. దాదాపు 5.7 లక్షల మంది రిటైల్‌ మదుపరులు ఉన్నారు.  పలు విదేశీ సంస్థలు కూడా ఇందులో వాటాదార్లుగా ఉన్నాయి. ఎల్‌జీఓఎఫ్‌ గ్లోబల్‌ ఆపర్చునిటీస్‌ ఫండ్‌కు 2.48%, శంకర్‌ శర్మకు 1.14%, సుబ్రతో సహాకు 2.02% వాటా ఉండటం గమనార్హం. ట్రేడింగ్‌ నిలిచిపోతే ఈ కంపెనీ షేర్లను వాటాదార్లు విక్రయించలేని పరిస్థితి ఏర్పడుతుంది. బీసీజీ షేరు ప్రస్తుతం స్టాక్‌ ఎక్స్ఛేంజీల్లో రూ.12.27 ధర వద్ద ఉంది.