PropEquity: రూ.60 లక్షల్లోపు ఇళ్ల నిర్మాణం తగ్గుతోంది

రూ.60 లక్షల్లోపు ఇళ్ల నిర్మాణం తగ్గుతోంది
జనవరి-మార్చిలో 38% క్షీణత: ప్రాప్‌ఈక్విటీ

దిల్లీ: అందుబాటు ధర (రూ.60 లక్షల వరకు) కొత్త ఇళ్ల సరఫరా దేశంలోని 8 ప్రధాన నగరాల్లో ఈ ఏడాది జనవరి-మార్చిలో 38% తగ్గిందని స్థిరాస్తి డేటా అనలిటిక్‌ సంస్థ ప్రాప్‌ఈక్విటీ తెలిపింది. బిల్డర్లు పెద్ద, విలాసవంత ఫ్లాట్లను నిర్మించడంపై అధికంగా దృష్టి సారిస్తున్నారని వివరించింది. సమీక్షా త్రైమాసికంలో రూ.60 లక్షల్లోపు ఇళ్లు/ఫ్లాట్లు 33,420 కు పరిమితమయ్యాయని పేర్కొంది. 2023 ఇదే సమయంలో వీటి సరఫరా 53,818 యూనిట్లుగా ఉంది. భూముల ధరలు-నిర్మాణ వ్యయాలు పెరగడంతో అందుబాటు ధర నివాస ప్రాజెక్టుల వల్ల తక్కువ లాభాలు వస్తున్నాయని బిల్డర్లు చెబుతున్నారని వివరించింది. దిల్లీ-ఎన్‌సీఆర్, ముంబయి మెట్రోపాలిటన్‌ రీజియన్‌ (ఎంఎంఆర్‌), బెంగళూరు, హైదరాబాద్, చెన్నై, కోల్‌కతా, పుణె, అహ్మదాబాద్‌ల్లో వివరాలు సేకరించి ఈ నివేదిక రూపొందించినట్లు ప్రాప్‌ఈక్విటీ పేర్కొంది. దిల్లీ, రాజధాని ప్రాంతంలో మాత్రమే అందుబాటు ధర ఇళ్ల సరఫరా, ఏడాది క్రితం కంటే పెరిగింది. ః 2022తో పోలిస్తే 2023లో రూ.60 లక్షల్లోపు ఇళ్ల సరఫరా 20% తగ్గింది. గతేడాది ఈ విభాగంలో 1,79,103 కొత్త ఇళ్లు అందుబాటులోకి వచ్చాయి. 2022లో ఇవి 2,24,141గా నమోదయ్యాయని ప్రాప్‌ఈక్విటీ ఎండీ, సీఈఓ సమీర్‌ జసుజా వెల్లడించారు. 2024లోనూ అందుబాటు ధర ఇళ్ల సంఖ్య మరింత తగ్గొచ్చని అంచనా వేశారు.