Cashless treatment: నగదు రహిత చికిత్సపై గంటలోపే నిర్ణయం

చివరి బిల్లు చెల్లింపు 3 గంటల్లో బీమా సంస్థలకు ఐఆర్‌డీఏఐ ఆదేశం
ఆరోగ్య బీమా పాలసీలపై కొత్త నిబంధనల జారీ
ఈనాడు - హైదరాబాద్‌

క్లెయిమ్‌ పరిష్కారాల కోసం పాలసీదారులు ఎలాంటి పత్రాలు సమర్పించాల్సిన అవసరం లేదని ఐఆర్‌డీఏఐ స్పష్టం చేసింది. బీమా సంస్థలు, టీపీఏలు తమకు అవసరమైన పత్రాలను ఆసుపత్రుల నుంచి సేకరించాలని స్పష్టం చేసింది. 

ఆరోగ్య బీమా పాలసీల విషయంలో భారతీయ బీమా నియంత్రణ, అభివృద్ధి ప్రాధికార సంస్థ (ఐఆర్‌డీఏఐ) కీలక నిర్ణయం తీసుకుంది. పాలసీదారు ఆసుపత్రిలో చేరి, బీమా కోసం క్లెయిం చేసిన గంటలోపే నగదు రహిత చికిత్స (క్యాష్‌లెస్‌ ఆథరైజేషన్‌)పై నిర్ణయం తీసుకోవాలని బీమా సంస్థలకు ఆదేశాలు జారీ చేసింది. ఆసుపత్రి నుంచి తుది బిల్లు వచ్చాక, 3 గంటల్లోగా దానికి తుది అనుమతి (ఫైనల్‌ ఆథరైజేషన్‌) ఇవ్వాలని స్పష్టం చేస్తూ  బుధవారం మాస్టర్‌ సర్క్యులర్‌ విడుదల చేసింది. ఆరోగ్య బీమా ఉత్పత్తులపై వివిధ సందర్భాల్లో జారీ చేసిన 55కు పైగా ఆదేశాల్లోని నిబంధనలను క్రోడీకరించి ఈ మాస్టర్‌ సర్క్యులర్‌ జారీ చేసింది. బీమా తీసుకునేటప్పుడు, క్లెయిం పరిష్కారాలకు సంబంధించిన అనుభవాన్ని మెరుగు పర్చేందుకు ఇది పాలసీదారులకు మార్గదర్శిగా ఉండనుంది. 

• వయసు, ప్రాంతం, ఆరోగ్య పరిస్థితులతో నిమిత్తం లేకుండా ఆరోగ్య బీమా పాలసీని బీమా సంస్థలు అందించాలి. ప్రీమియం చెల్లింపు సామర్థ్యం ఆధారంగా, అందుబాటులో ఉన్న పాలసీల్లో ఇష్టం ఉన్న వాటిని ప్రజలు ఎంచుకుంటారు. బీమా సంస్థ అందిస్తున్న పాలసీలు, రైడర్‌లు, యాడ్‌-ఆన్‌లు తదితర విస్తృత ఎంపికలను అందించాలి. అవసరాన్ని బట్టి, రకరకాల పాలసీలను తీసుకొచ్చే అవకాశం బీమా సంస్థలకు ఉంది. 
• ప్రతి పాలసీ పత్రంతో పాటు కస్టమర్‌ ఇన్ఫర్మేషన్‌ షీట్‌ (సీఐఎస్‌) అందించాలి. బీమా పాలసీ రకం, బీమా మొత్తం, కవరేజీ వివరాలు, మినహాయింపులు, ఉప- పరిమితులు, తగ్గింపులు, వేచి ఉండే కాలాల వంటివి సులభ పదాల్లో ఇందులో వివరించాలి. 
• పాలసీ వ్యవధిలో ఎలాంటి క్లెయిమ్‌లు లేకపోతే.. బీమా మొత్తాన్ని పెంచడం, ప్రీమియం మొత్తాన్ని తగ్గించడం, నో క్లెయిమ్‌ బోనస్‌ ఎంచుకోవడంలో ఏదో ఒక దాన్ని ఎంచుకునే సౌలభ్యాన్ని పాలసీదారులకు సంస్థ కల్పించాలి. 
• ఒకటికి మించి పాలసీలు ఉన్నప్పుడు ఏ పాలసీని ప్రాథమికంగా క్లెయిం చేసుకోవాలన్నది పాలసీదారుడు నిర్ణయించుకోవచ్చు. బిల్లు అధికంగా అయినప్పుడు మొదటి బీమా సంస్థ, మరో బీమా సంస్థతో సమన్వయం చేసుకుని, ఆ మొత్తాన్ని చెల్లించేలా చూడాలి. 
• పాలసీ తీసుకునేందుకూ, పాలసీ పునరుద్ధరణ, సేవలు, ఫిర్యాదుల పరిష్కారం తదితరాల కోసం అవసరమైన సాంకేతిక సేవలను అందించాలి. 
• 100% నగదు రహిత చికిత్సను అందించేలా బీమా సంస్థ తగిన చర్యలను నిర్ణీత సమయంలో తీసుకోవాలి.   
• ఒప్పందం కుదుర్చుకున్న ఆసుపత్రుల వివరాలను తమ వెబ్‌సైట్లలో సంస్థ తప్పనిసరిగా పేర్కొనాలి. ఒకవేళ ఒప్పందం లేని ఆసుపత్రిలో పాలసీదారు చేరితే, పాటించాల్సిన విధానాలను తెలియజేయాలి. 
• ఇన్సూరెన్స్‌ ఇన్ఫర్మేషన్‌ బ్యూరో ఆఫ్‌ ఇండియా (ఐఐబీ) పోర్టల్‌లో ఆరోగ్య బీమా పాలసీల పోర్టబిలిటీకి దరఖాస్తు చేసినప్పుడు.. రెండు బీమా సంస్థలూ నిర్ణీత సమయంలోగా చర్యలు తీసుకోవాలి. 
• బీమా అంబుడ్స్‌మన్‌ ఇచ్చిన ఆదేశాలను అమలు చేయని పక్షంలో, బీమా సంస్థ పాలసీదారుకు రోజుకు రూ.5,000 చొప్పున పరిహారం చెల్లించాలి. 
• చికిత్స సమయంలో పాలసీదారు మరణిస్తే, మృతదేహాన్ని వెంటనే బంధువులకు అప్పగించాలని ఐఆర్‌డీఏఐ పేర్కొంది.