Blast in factory: పరిశ్రమలో రియాక్టర్‌ పేలి ఏడుగురి మృతి.. 50 మందికి పైగా గాయాలు

ఠానే: మహారాష్ట్రలోని ఠానేలో ఓ రసాయన పరిశ్రమలో భారీ పేలుడు సంభవించింది. ఈ ఘటనలో ఏడుగురు మృతి చెందగా.. 56 మందికి గాయాలయ్యాయి. డోంబివిలి ఎంఐడీసీ ఫేజ్‌ -2 ప్రాంతంలోని అముదాన్‌ కెమికల్‌ కంపెనీలో ఈ మధ్యాహ్నం 1.40 గంటల సమయంలో రియాక్టర్‌ పేలడంతో ఈ విషాదం చోటుచేసుకున్నట్లు అధికారులు వెల్లడించారు. ఇప్పటివరకు ఈ ఘటనలో ఏడు మృతదేహాలను గుర్తించగా.. ఇద్దరు మహిళలు ఉన్నట్లు అధికారులు వెల్లడించారు. ఈ పేలుడు కారణంగా పెద్దఎత్తున చెలరేగిన మంటల ప్రభావం ఆ ప్రాంతంలో కనీసం ఐదు కంపెనీలపై పడినట్లు తెలిపారు. ఈ పేలుడు ధాటికి దాదాపు కి.మీ. మేర శబ్దం వినిపించినట్లు ప్రత్యక్షసాక్షి చెప్పారు. పక్కనే ఉన్న భవనాల అద్దాలకు పగుళ్లు రాగా..  పరిసరాల్లోని పలు ఇళ్లు సైతం దెబ్బతిన్నట్లు అధికారులు తెలిపారు.

బెంగళూరు రేవ్‌ పార్టీ.. తెలుగు నటికి డ్రగ్‌ పాజిటివ్‌: పోలీసులు

ముంబయికి 40 కి.మీ.ల దూరంలో ఉన్న మహారాష్ట్ర పారిశ్రామికాభివృద్ధి కార్పొరేషన్‌ (MIDC) ప్రాంతంలో ఈ ఘటన జరగ్గా..  పరిశ్రమల శాఖ మంత్రి ఉదయ్‌ సమంత్‌, ఎంపీ శ్రీకాంత్‌ శిందే, ఎమ్మెల్యే రాజు పాటిల్‌ అక్కడికి వెళ్లి పరిశీలించారు.  ఈ ఘటనపై సీఎం ఏక్‌నాథ్ శిందే స్పందించారని.. క్షతగాత్రులకు అయ్యే ఖర్చును ప్రభుత్వమే భరిస్తుందని హామీ ఇచ్చినట్లు మంత్రి సమంత్‌ విలేకర్లకు వెల్లడించారు. బాధితులకు వారం రోజుల్లోగా పరిహారం అందేలా చర్యలు తీసుకోవాలని ఆదేశించారన్నారు.