ఇసుక తరలింపును అడ్డుకున్నవారిపై కేసు

కొల్లిపర, న్యూస్‌టుడే: గుంటూరు జిల్లా కొల్లిపర మండలం మున్నంగి ఇసుక రీచ్‌లో గ్రామస్థులపై దాడులకు పాల్పడినవారిపై కేసులు నమోదుచేశామని కొల్లిపర ఎస్సై ఆర్‌.రవీంద్రారెడ్డి శనివారం తెలిపారు. మున్నంగి గ్రామానికి చెందిన వేమూరి మోషే, వేమూరి చింతయ్య, యల్లమాటి సంజీవ్‌, మల్లికార్జున్‌, అంజి తదితరులపై వేమూరి అశోక్‌ ఇచ్చిన ఫిర్యాదు మేరకు కేసు నమోదు చేశామని పేర్కొన్నారు. వేమూరి మోషే ఇచ్చిన ఫిర్యాదు మేరకు వేమూరి అశోక్‌, బాలరాజు, వేమూరి రాజేష్‌లపైనా కేసు నమోదు చేశామన్నారు. మున్నంగి ఇసుక రీచ్‌లో ఇసుక అక్రమ తరలింపులు నిలువరించాలంటూ అడ్డుపడిన గ్రామస్థులపై.. అక్రమార్కులు దాడులకు పాల్పడిన విషయం తెలిసిందే. అక్రమ తరలింపును అడ్డుకున్న బాధితులపైనా కేసులు నమోదు చేయడాన్ని ప్రజలు విమర్శిస్తున్నారు.