పాఠశాల బస్సు బోల్తా.. ఆరుగురి దుర్మరణం

20 మందికి గాయాలు
హరియాణాలో ఘటన

చండీగఢ్‌: హరియాణాలో ఘోర రోడ్డు ప్రమాదం సంభవించింది. మహేంద్రగఢ్‌ జిల్లాలో గురువారం ఉదయం పాఠశాల విద్యార్థులను తీసుకెళుతున్న బస్సు చెట్టును ఢీకొని బోల్తా పడింది. ఈ ఘటనలో ఆరుగురు చిన్నారులు అక్కడికక్కడే ప్రాణాలు కోల్పోయారు. మరో 20 మంది గాయపడ్డారు. వీరిలో కొందరి పరిస్థితి విషమంగా ఉన్నట్లు సమాచారం. ఈ ఘటనకు సంబంధించి పోలీసులు పాఠశాల ప్రిన్సిపల్‌, మద్యం మత్తులో ఉన్న డ్రైవర్‌ సహా ముగ్గురిని అరెస్టు చేశారు. ప్రమాదం సంగతి తెలియగానే ఘటనా స్థలానికి వెళ్లిన రాష్ట్ర విద్యాశాఖ మంత్రి సీమా త్రిఖా.. రంజాన్‌ పర్వదినం సందర్భంగా గురువారం సెలవు ప్రకటించినప్పటికీ పాఠశాలకు ఎందుకు సెలవు ఇవ్వలేదనే విషయమై ప్రైవేటు విద్యాసంస్థ యాజమాన్యానికి షోకాజ్‌ నోటీసు జారీ చేశామన్నారు.