నిర్మాణానికి తీసుకొచ్చిన ఇసుకలో మృతదేహం

బాపట్ల జిల్లాలో కలకలం

చీరాల అర్బన్‌ (ఈపూరుపాలెం) న్యూస్‌టుడే: ఇంటి నిర్మాణం కోసం తీసుకొచ్చిన ఇసుకలో తల లేని మృతదేహం బయటపడిన ఘటన బాపట్ల జిల్లాలో చోటు చేసుకుంది. పోలీసుల కథనం ప్రకారం.. చీరాల మండలం ఈపూరుపాలేనికి చెందిన కాగిత రాంబాబు అనే వ్యక్తి ఇంటి నిర్మాణం చేపడుతున్నారు. దీని నిమిత్తం నాలుగు రోజుల క్రితం ఒక గుత్తేదారుడితో ఇసుక కోసం ఒప్పందం కుదుర్చుకున్నారు. అదే రోజు రాత్రి సదరు గుత్తేదారు పది ట్రాక్టర్ల ఇసుక తీసుకొచ్చి కుప్పగా పోశారు. శుక్రవారం దాన్ని పొక్లెయిన్‌తో  బేస్‌మెంట్‌లో పోయడానికి ప్రయత్నించగా మృతదేహం బయటపడింది. మృతదేహానికి తల లేదని, ఎడమ చేయి చిన్నగా ఉండగా కుడి చేయిపై ప్రేమ చిహ్నంతో పాటు పసుపుపచ్చ దారం కట్టి ఉందని చీరాల గ్రామీణ సీఐ నిమ్మగడ్డ సత్యనారాయణ తెలిపారు. కేసు నమోదు చేసిన పోలీసులు.. మృతదేహాన్ని పరీక్ష నిమిత్తం చీరాల ఆసుపత్రికి తరలించారు. ఇసుకను ఎక్కడి నుంచి తీసుకొచ్చారనే కోణంలో పోలీసులు దర్యాప్తు ప్రారంభించారు.