అక్రమ వడ్డీ వ్యాపారులపై ఉక్కుపాదం

సిద్దిపేట జిల్లాలో 38 కేసులు నమోదు
రూ.1.21 కోట్లు స్వాధీనం

న్యూస్‌టుడే, సిద్దిపేట: ఎలాంటి అనుమతి లేకుండా వడ్డీ వ్యాపారం నిర్వహిస్తున్న వ్యాపారులపై పోలీసులు ఉక్కుపాదం మోపారు. శనివారం ఏకకాలంలో సిద్దిపేట జిల్లాలోని పట్టణాలు, మండల కేంద్రాలు, ముఖ్యమైన గ్రామాల్లో సోదాలు నిర్వహించారు. నిఘా వర్గాల సమాచారం మేరకు 24 బృందాలుగా ఏర్పడ్డ పోలీసులు.. ఆకస్మిక తనిఖీలు చేపట్టారు. నిబంధనలకు విరుద్ధంగా  ఫైనాన్స్‌ వ్యాపారం నిర్వహిస్తున్న వారిని లక్ష్యంగా చేసుకొని ఇళ్లు, దుకాణాల్లో నిశితంగా పరిశీలించారు. ప్రైవేటు చిట్టీలు నడిపే వారిళ్లలోనూ సోదాలు చేశారు. మొత్తం 38 కేసులు నమోదు చేయగా.. రూ.1,21,27,120 నగదు, 70 తులాల బంగారు ఆభరణాలు, 13 కిలోల వెండి, వివిధ రకాల డాక్యుమెంట్లు, ప్రామిసరీ నోట్లు స్వాధీనం చేసుకున్నారు.