విమానాశ్రయానికి బాంబు బెదిరింపు

బెంగళూరు (గ్రామీణం), న్యూస్‌టుడే: బెంగళూరు కెంపేగౌడ అంతర్జాతీయ విమానాశ్రయానికి బాంబు బెదిరింపు రావడం కలకలం రేపింది. విమానాశ్రయంలోని ఆల్ఫా-3 భవంతిలో ఉన్న ఒక వాష్‌రూం అద్దంపై బాంబు బెదిరింపు సందేశాలను గుర్తు తెలియని నిందితుడు కన్నడలో రాశాడు. మరో 25 నిమిషాల్లో తాను పెట్టిన బాంబులతో భవంతులు పేలిపోతాయని దానిపై రాసి ఉంది. బుధవారం ఉదయం దానిని గుర్తించిన అక్కడి సిబ్బంది వెంటనే పోలీసులకు సమాచారం అందించారు. క్షుణ్ణంగా సోదాలు చేసిన అనంతరం దానిని ఉత్తుత్తి బెదిరింపుగా గుర్తించారు. సీసీ కెమెరా రికార్డుల ఆధారంగా దర్యాప్తు చేస్తున్నారు.