మోసపోయిన అమెరికన్‌ మహిళ.. రూ.6 కోట్లకు నకిలీ నగల కొనుగోలు

ఎంబసీ జోక్యంతో విచారణ
పరారీలో జైపుర్‌ వ్యాపారి

జైపుర్‌: అమెరికాకు చెందిన చెరిష్‌ అనే మహిళ జైపుర్‌లోని ఓ దుకాణ యజమాని నుంచి నకిలీ నగలు కొని రూ.6 కోట్లు నష్టపోయారు. రాజస్థాన్‌ రాజధాని నగరమైన జైపుర్‌లోని మనక్‌ చౌక్‌ పోలీస్‌స్టేషను పరిధిలో ఉన్న జొహ్రీ బజారు దుకాణం నుంచి ఆమె ఈ నగలు కొన్నారు. గత ఏప్రిల్‌ నెలలో ఆ నగలతో అమెరికాలో ప్రదర్శన ఏర్పాటుచేయగా.. అవి అసలు నగలు కావనే విషయం అక్కడ బయటపడింది. నగలతో మళ్లీ జైపుర్‌కు చేరుకున్న చెరిష్‌ దుకాణ యజమాని రాజేంద్ర సోని, అతడి కుమారుడు గౌరవ్‌లను నిలదీశారు. ఆమె మాటలు నిజం కాదని రాజేంద్ర బుకాయించడంతో మే 18న మనక్‌ చౌక్‌ పోలీస్‌స్టేషనులో చెరిష్‌ ఫిర్యాదు చేశారు. నిందితుడైన రాజేంద్ర సోని తిరిగి బాధితురాలిపై తప్పుడు కేసు పెట్టాడు. ఈ విషయాన్ని అమెరికన్‌ రాయబార కార్యాలయం దృష్టికి చెరిష్‌ తీసుకువెళ్లారు. ఎంబసీ జోక్యంతో జైపుర్‌ పోలీసులు విచారణను వేగవంతం చేసి రాజేంద్ర అమ్మిన నగలు నకిలీయే అని తేల్చారు. తండ్రీకొడుకులు ఇద్దరూ పరారీలో ఉన్నారని, ఆ నగలకు ధ్రువపత్రం జారీచేసిన నందకిశోర్‌ అనే వ్యక్తిని అరెస్టు చేసినట్లు పోలీసులు తెలిపారు. రాజేంద్ర జైపుర్‌లో ఇటీవలే రూ.3 కోట్ల ఫ్లాటు కొన్నట్లు తెలిసిందన్నారు. నిందితులు వెండి నగలకు బంగారుపూత పూసి అమెరికన్‌ మహిళను మోసం చేశారని, వారి కోసం గాలింపునకు ప్రత్యేక బృందాలను ఏర్పాటుచేసినట్లు అదనపు డీసీపీ బజరంగ్‌ సింగ్‌ షెకావత్‌ తెలిపారు.