పంటలు దెబ్బతిన్నాయని.. రైతు బలవన్మరణం

లింగాపూర్, న్యూస్‌టుడే: తుపాను ప్రభావంతో కురుస్తున్న వర్షాలకు పంట నష్టాలను చవిచూసిన ఓ అన్నదాత ఆత్మహత్య చేసుకున్న ఘటన కుమురం భీం జిల్లా లింగాపూర్‌ మండలంలో చోటుచేసుకుంది. ఎస్సై గంగన్న తెలిపిన వివరాల ప్రకారం.. సీతారాంనాయక్‌ తండాకు చెందిన జాదవ్‌ బలిరాం(59) తనకున్న ఏడు ఎకరాల్లో పత్తి, మొక్కజొన్న సాగు చేస్తున్నారు. వర్షాలకు పంటలు దెబ్బతిన్నాయి. బుధవారం తన వ్యవసాయ క్షేత్రాలకు వెళ్లిన ఆయన పంట నష్టపోయిన పరిస్థితులను చూసి మనస్తాపానికి గురయ్యారు. మధ్యాహ్నం అక్కడే పురుగుమందు తాగారు. విషయం తెలుసుకున్న కుటుంబీకులు వెంటనే చికిత్స నిమిత్తం సిర్పూర్‌(యు) ఆసుపత్రికి తరలించారు. పరిస్థితి విషమించడంతో మెరుగైన వైద్యం కోసం ఉట్నూర్‌ ప్రభుత్వ ఆసుపత్రికి తరలించగా, చికిత్స పొందుతూ రాత్రి మృతి చెందారు.