దిగుబడి రాదనే మనస్తాపంతో అన్నదాత బలవన్మరణం

వాంకిడి, న్యూస్‌టుడే: అధిక వర్షాలతో పంట దెబ్బతిని.. దిగుబడి వచ్చేలా లేదని కలత చెంది పత్తి రైతు పురుగు మందు తాగి బలవన్మరణానికి పాల్పడ్డాడు. ఈ ఘటన ఆసిఫాబాద్‌ జిల్లా వాంకిడిలో చోటు చేసుకుంది. కుటుంబ సభ్యులు తెలిపిన వివరాల ప్రకారం.. మండల కేంద్రంలోని మసీదు వాడకు చెందిన బుట్లె సుధాకర్‌(34) తన సొంత భూమి 5 ఎకరాలతోపాటు, కౌలుకు తీసుకున్న 4 ఎకరాల్లో పత్తి సాగు చేశారు. ఈ ఏడాది అధిక వర్షాల కారణంగా పత్తి పంట పూర్తిగా దెబ్బతింది. దీంతో పెట్టుబడి సైతం వచ్చేలా లేదని ఆందోళన చెందేవారు. పత్తికి పురుగు మందు పిచికారీ చేసి ఇంటికి వచ్చి శనివారం రాత్రి పురుగు మందు తాగారు. వాంతులు చేసుకోవడం చూసిన కుటుంబ సభ్యులు అడగ్గా.. తాను పురుగు మందు తాగినట్లు చెప్పారు. ఆసుపత్రికి తరలిస్తుండగా మార్గం మధ్యలోనే సుధాకర్‌ మృతి చెందారు. ఆదివారం భార్య సంగీత ఇచ్చిన ఫిర్యాదుతో కేసు నమోదు చేసినట్లు ఎస్సై మహేందర్‌ తెలిపారు.