కన్నకూతుళ్లను కీచకులకు అప్పగించిన తల్లికి.. 40 ఏళ్ల జైలు శిక్ష..!

తిరువనంతపురం: కంటికిరెప్పలా కాపాడాల్సిన బిడ్డల్ని ఓ తల్లి మానవత్వం మరిచి కీచకులకు అప్పగించింది. మాతృత్వానికే మాయని మచ్చ తెచ్చింది. ఈ కేసును తీవ్రంగా పరిగణించిన కోర్టు ఆమెకు పోక్సో చట్టం కింద 40 ఏళ్ల జైలు శిక్షను విధించింది. కేరళ(Kerala)లో ఈ ఘటన జరిగింది.

ఈ కేసులో ఏం జరిగిందంటే..?

పోలీసులు కథనం ప్రకారం.. తన భర్త మానసికంగా అనారోగ్యానికి గురికావడంతో నిందితురాలు అతడిని వదిలేసి, శిశుపాలన్ అనే వ్యక్తితో సహజీవనం చేసింది. ఏడేళ్ల చిన్న కుమార్తె అప్పుడు ఆమె వద్దే ఉండేంది. శిశుపాలన్ ఆ బాలికను లైంగిక వేధించడంతో.. ఆమె గాయపడింది. ఆ పసిప్రాణం తన బాధను తల్లికి చెప్పింది. కానీ, నిందితురాలు ఆ బిడ్డ మాటలు పట్టించుకోకపోగా.. ఆమెను పదేపదే శిశుపాలన్ ఇంటికి పంపి, లైంగిక దాడికి సహకరించింది. కొద్దిరోజులకు తన వద్దకు వచ్చిన అక్క(11 ఏళ్లు)కు ఆ చిన్నారి తన గోడును చెప్పుకొంది. మరోవైపు పెద్ద కుమార్తెను కూడా శిశుపాలన్ వదల్లేదు.

సొరంగం వద్ద శరవేగంగా పనులు.. ఇంకా 10 మీటర్ల దూరంలో కూలీలు

దాంతో ఒకరోజు ఈ ఇద్దరు పిల్లలు ఇంటి నుంచి తప్పించుకొని తమ బామ్మ ఇంటికి వెళ్లారు. ఆమె ద్వారా విషయం బయటకు రావడంతో పిల్లల్ని బాలల సంరక్షణా కేంద్రానికి తరలించారు. అప్పుడే ఆ బాలికలు తాము ఎదుర్కొన్న భయానక పరిస్థితుల అక్కడి అధికారులకు వెల్లడించారు. ఇదంతా 2018-2019 మధ్య జరిగింది. శిశుపాలన్‌తో పాటు మరో వ్యక్తి కూడా వారిపై లైంగిక దాడి చేసినట్లు స్పెషల్‌ పబ్లిక్‌ ప్రాసిక్యూటర్‌ ఆర్‌ఎస్‌ విజయ్‌ మోహన్ మీడియాకు వెల్లడించారు.

కేరళ స్పెషల్ ఫాస్ట్ ట్రాక్‌ కోర్టు (Kerala special Fast Track Court) ఈ కేసును తీవ్రంగా పరిగణించింది. ఆ తల్లి చర్యలు మాతృత్వానికే అవమానకరమని ఆవేదన వ్యక్తం చేసింది. ఈ కేసులో ఆమెను దోషిగా తేలుస్తూ.. 40 ఏళ్ల జైలు శిక్ష విధించింది. అలాగే రూ.20 వేల జరిమానా చెల్లించాలని ఆదేశించింది. ఈ కేసు విచారణ సమయంలోనే శిశుపాలన్‌ ఆత్మహత్య చేసుకున్నాడు. ఈ కేసులో 22 మంది సాక్షుల్ని విచారించారు.