Rev Party: రేవ్‌ పార్టీలో ఆ తెలుగు నటి పాల్గొన్నారు: బెంగళూరు కమిషనర్‌

ఇంటర్నెట్‌ డెస్క్‌: బెంగళూరు రేవ్‌ పార్టీ టాలీవుడ్‌లో కలకలం సృష్టిస్తోంది. నగర శివారులో నిర్వహించిన రేవ్‌ పార్టీలో తెలుగు నటి పాల్గొన్నట్లు బెంగళూరు సిటీ కమిషనర్‌ దయానంద్‌ స్పష్టం చేశారు. ఆ నటి సోమవారం విడుదల చేసిన వీడియో ఎక్కడి నుంచి తీశారో విచారణ జరుపుతున్నట్లు తెలిపారు. 'సన్ సెట్ టు సన్ రైస్ విక్టరీ' పేరుతో నిర్వహించిన ఈ ఈవెంట్‌లో దాదాపు వంద మంది పాల్గొన్నట్లు చెప్పారు. మొత్తంగా అందరి నుంచి రూ. 50 లక్షలు వసూలు చేశారని తెలిపారు. ఇందులో ప్రజా ప్రతినిధులెవరూ పాల్గొనలేదని చెప్పిన ఆయన.. ఈ వ్యవహారంలో మొత్తంగా ఐదుగురిని అరెస్ట్‌ చేసినట్లు తెలిపారు.

రేవ్‌ పార్టీ హైదరాబాద్‌లో వద్దనుకొని.. బెంగళూరును ఎంచుకుని..

మరోవైపు ఈ ఘటనపై కర్ణాటక హోంమంత్రి జి.పరమేశ్వర స్పందించారు. ‘‘రేవ్‌ పార్టీలో కోట్ల రూపాయల విలువైన కొకైన్‌, గంజాయి స్వాధీనం చేసుకున్నాం. రాష్ట్రాన్ని డ్రగ్స్‌ ఫ్రీగా మార్చాలని చేసే ప్రయత్నాలు ఇతర రాష్ట్రాల డ్రగ్స్‌ పెడ్లర్ల వల్ల విఫలమవుతున్నాయి. ఈ కేసులో అరెస్ట్‌ చేసిన వారి నుంచి మరిన్ని వివరాలు సేకరిస్తాం’’ అని తెలిపారు.

బెంగుళూరు శివారులో ఓ వ్యాపారవేత్తకు చెందిన ఫామ్‌ హౌస్‌లో నిర్వహించిన రేవ్‌ పార్టీలో పలువురు తెలుగు టీవీ నటీనటులు, మోడళ్లు పట్టుబడిన విషయం తెలిసిందే. ఆ పార్టీలో తాను లేనని తెలుపుతూ నటి ఒకరు సోమవారం ఓ వీడియో విడుదల చేశారు. తాను హైదరాబాద్‌లోనే ఉన్నానని.. తనపై వస్తోన్న వార్తలను నమ్మొద్దని విజ్ఞప్తి చేశారు. అయితే ఇప్పుడు ఆమె ఆ పార్టీలో పాల్గొన్నట్లు కమిషనర్‌ చెప్పడం గమనార్హం.