NEET 2025 exam: ‘నీట్‌’ రాసేందుకు వెళ్తూ.. ప్రమాదంలో ముగ్గురి దుర్మరణం

జైపుర్‌: వైద్య విద్యా కోర్సుల్లో ప్రవేశాలకు నిర్వహించే నీట్‌ (యూజీ) పరీక్ష రాసేందుకు వెళ్తుండగా విషాదం చోటుచేసుకుంది. ఈ ఘటనలో ముగ్గురు మృతిచెందారు. వీరిలో ఇద్దరు నీట్‌ అభ్యర్థులు ఉండగా.. వారితో పాటు ఉన్న మరో వ్యక్తి ప్రాణాలు కోల్పోయారు. రాజస్థాన్‌లోని జైపుర్‌ జిల్లాలో జరిగిన ఈ ఘటన పెను విషాదం రేపింది. ఇద్దరు విద్యార్థినులు మరో వ్యక్తితో కలిసి ద్విచక్రవాహనంపై నీట్‌ పరీక్ష రాసేందుకు ఆదివారం మధ్యాహ్నం పరీక్ష కేంద్రానికి వెళ్తుండగా ఓ వంతెన వద్ద వేగంగా వచ్చిన ట్రక్కు ఢీకొట్టడంతో ఈ దుర్ఘటన జరిగినట్లు పోలీసులు వెల్లడించారు. మృతులను ఖుషి శర్మ (21), ప్రియా శర్మ(22)గా గుర్తించారు.  వీరిద్దరూ బస్సీ పట్టణం సమీపంలోని ఓ గ్రామానికి చెందినవారని తెలిపారు. ఈ ప్రమాదంలో ముగ్గురు ప్రాణాలు కోల్పోవడంతో ట్రక్కు డ్రైవర్‌ అక్కడి నుంచి పరారయ్యాడు. కేసు నమోదు చేసుకున్న పోలీసులు దర్యాప్తు చేస్తున్నారు.