NTR district: మున్నేరు వాగులో ఈతకు దిగి.. ముగ్గురి మృతి, ఇద్దరి పరిస్థితి విషమం

నందిగామ: ఎన్టీఆర్‌ జిల్లా కంచికచర్ల మండలంలోని కీసర వద్ద మున్నేరు వాగులో ఈతకు దిగి ఐదుగురు యువకులు గల్లంతయ్యారు. సరదాగా ఈత కొట్టేందుకు వచ్చిన వీరు లోతు తెలియక నీటిలో మునిగిపోయారు. అక్కడే ఉన్న స్నేహితులు కేకలు వేయడంతో.. గమనించిన స్థానికులు బయటకు తీశారు. అప్పటికే ముగ్గురు యువకులు మృతి చెందగా, మిగిలిన ఇద్దరిని నందిగామ ప్రభుత్వాస్పత్రికి తరలించారు. ప్రస్తుతం వీరి పరిస్థితి విషమంగా ఉన్నట్లు వైద్యులు తెలిపారు. సమాచారం తెలుసుకున్న పోలీసులు ఘటనాస్థలికి చేరుకున్నారు. మృతులను నందిగామ మండలం ఐతవరం గ్రామానికి చెందిన చేజర్ల దినేశ్‌, యడవల్లి గణేశ్‌, గాలి సంతోష్‌ కుమార్‌గా గుర్తించారు. ఘటనపై కేసు నమోదు చేసిన పోలీసులు దర్యాప్తు చేపట్టారు.