Kakinada: షాంపూతో జుట్టు రాలిందని మహిళ దూషణ.. చాకుతో దాడిచేసిన యువకుడు

చికిత్సపొందుతున్న సత్యవతి

మసీదుసెంటర్‌(కాకినాడ): ఓ వృద్ధురాలిపై యువకుడు చాకుతో దాడిచేసి తీవ్రంగా గాయపరిచాడు. కాకినాడ రెండో పట్టణ పోలీసులు హత్యాయత్నం కేసు నమోదు చేశారు. వారు తెలిపిన వివరాల ప్రకారం.. గాంధీనగర్‌ వెంకటనారాయణవీధికి చెందిన చెల్లంచెర్ల సత్యవతి ఇటీవల ఓ జనరిక్‌ మందుల దుకాణంలో షాంపూ కొన్నారు. అది వాడిన తర్వాత జుట్టంతా రాలిపోయిందని ఆ దుకాణంలో పనిచేస్తున్న యువకుడు పెన్నాడ వెంకటేష్‌ను ఆమె దూషించడం ప్రారంభించారు.

రోజూ దుర్భాషలాడటంతో అతను చంపేయాలని నిర్ణయించుకున్నాడు. ఆదివారం పక్కనే ఉన్న ప్లాస్టిక్‌ దుకాణంలో రూ.30 చాకు కొన్నాడు. ఆమె ఇంట్లో ఒంటరిగా ఉన్న సమయంలో వెళ్లి శరీరంపై పలుచోట్ల పొడిచాడు. ఇంతలో చాకు విరిగిపోవడంతో అక్కడి నుంచి వెళ్లిపోయాడు. ఆమె ఆసుపత్రిలో చికిత్స పొందుతున్నారని ప్రాణాపాయం లేదని పోలీసులు తెలిపారు. నిందితుడు పోలీసుల అదుపులో ఉన్నాడు. పెనుగులాటలో ఆమె బంగారు గొలుసు ఘటనా స్థలంలోనే కింద పడిపోయి అక్కడే ఉందన్నారు. తొలుత ప్రచారం జరిగినట్లు బంగారు గొలుసు కోసం ఈ దాడి చేయలేదని టుటౌన్‌ సీఐ నాగేశ్వర్‌నాయక్‌ తెలిపారు.