వంతెనలు కూలుతున్నా.. కునుకు వీడరా!

వైకాపా పాలనలో భూతద్దం పెట్టి వెతికినా అభివృద్ధి కనిపించదు అని చెప్పడానికి ఈ చిత్రాలే నిదర్శనం. వంకలు, నదులపై నిర్మించిన వంతెనలు, కల్వర్టులు దెబ్బతిన్నా జగన్‌ ఐదేళ్ల పాలనలో కనీసం వాటి మరమ్మతుకు అడుగు ముందుకు పడలేదు. దీంతో ఆ దారిలో రాకపోకలు సాగించే వాహనదారులు, ప్రజలు భయంభయంగా ప్రయాణం సాగించాల్సి వస్తోంది.

న్యూస్‌టుడే, బృందం

చెప్పినా పట్టించుకోరు:

బండిఆత్మకూరులో కుందూనదిపై నిర్మించిన వంతెన కింది భాగంలోని పిల్లర్లు దెబ్బతిన్నాయి. ఈ వంతెనను గత 30 సంవత్సరాల కిందట నిర్మించారు. అప్పటి నుంచి ఎలాంటి మరమ్మతులు చేపట్టలేదు. సమస్యను సంబంధిత అధికారులకు చెప్పినా పట్టించుకున్న పాపాన పోలేదని గ్రామస్థులు పేర్కొంటున్నారు.

రక్షణ జాతీయం

ఆళ్లగడ్డ, గ్రామీణం: బత్తలూరు-యర్రగుడిదిన్నె మధ్య 40వ జాతీయ రహదారిపై ఉన్న వంతెనకు రక్షణ గోడ ధ్వంసమైంది. వేగంతో వెళ్లే వాహనాలు ప్రమాదాల బారిన పడే అవకాశముంది.

నేటికీ బ్రిటిష్‌ పాలనే..:

దేవనకొండ: కర్నూలు-బళ్లారి రహదారిలోని అలారుదిన్నె సమీపంలోని వంతెనను 1940లో బ్రిటిష్‌ వారు రూ.1.25లక్షలతో నిర్మించారు. వంతెన రక్షణ గోడలు శిథిలావస్థకు చేరాయి.

ప్రయాణం.. తప్పని అంతరాయం:

కొత్తపల్లి: దుద్యాల గ్రామ సమీపంలోని వంతెనకు రక్షణ గోడలు లేవు. వంతెన ఎత్తు తక్కువగా ఉండటంతో వర్షం వస్తే రహదారిపై నీరు ప్రవహిస్తుంది.

చినుకు పడితే.. వణుకే:

ఆత్మకూరు: ఆత్మకూరు-కొత్తపల్లికి వెళ్లే దారిలో వంతెన ఎత్తు తక్కువగా ఉండటంతో వర్షాలు కురిసినప్పుడు నీరు వంతెనపై ప్రవహిస్తుంది. ఆ దారిలో రాకపోకలు నిలిచిపోతున్నాయి.

పట్టించుకోని సర్కారు:

మద్దికెర-పత్తికొండ రహదారిలో బురుజుల వద్ద నిర్మించిన ప్రధాన వంతెనకు ఇరువైపులా వేసిన మట్టి పూర్తిగా కోతకు గురైంది. ఎలాంటి చర్యలు చేపట్టకపోవడంతో పలువురు వాహనచోదకులు ప్రమాదాలకు గురయ్యారు.

నాలుగేళ్లుగా ఇంతే.. :

బురుజుల-హోసూరు మధ్య ఉన్న కల్వర్టు శిథిలమై నాలుగేళ్లు గడిచింది. ఆర్‌అండ్‌బీ అధికారులు తాత్కాలిక మరమ్మతు పేరుతో మట్టివేసి పూడ్చేశారు. భారీ వర్షం కురిసిన ప్రతిసారి వాగు పొంగి రహదారిపైకి వరద నీరు వస్తోంది.

పొంచి ఉన్న ప్రమాదం:

పత్తికొండ గ్రామీణం: చిన్నహుల్తి సమీపంలోని హంద్రీవాగుపై ఉన్న పురాతన వంతెన రక్షణ గోడలు దెబ్బతిన్నాయి. ఈ దారిలో నిత్యం వందల సంఖ్యలో వాహనాలు రాకపోకలు    సాగిస్తుంటాయి. మలుపు గమనించని వాహనాలు వాగులో పడే ప్రమాదముంది.  

చోద్యం చూస్తున్నారు:

మంత్రాలయం గ్రామీణం: కౌతాళం మండలంలోని హాల్వి వద్ద కోసిగి రహదారిలో ఉన్న వంతెనకు రెండు వైపులా రక్షణ గోడలు లేకపోవడంతో వాహనాల రాకపోకలకు ప్రమాదకరంగా మారింది.

దెబ్బతిన్నా.. వదిలేశారు:

నంద్యాల బొమ్మలసత్రం: టంగుటూరు -బనగానపల్లికి వెళ్లే దారిలో అప్పలాపురం వద్ద దెబ్బతిన్న వంతెన.