సముద్రంలో యువకుడి గల్లంతు

పెదవాల్తేరు, న్యూస్‌టుడే : సముద్రంలో ఓ యువకుడు గల్లంతయ్యాడు. దీనికి సంబంధించి మూడో పట్టణ పోలీసులు అందించిన వివరాలు ఇలా ఉన్నాయి. కంచరపాలెంకు చెందిన చిన్నం యువరాజ్‌ (18) ప్రభుత్వ ఐటీఐలో మొదటి సంవత్సరం చదువుతున్నాడు. ఆదివారం కొంతమంది స్నేహితులతో బీచ్‌కు చేరుకున్నాడు. పార్క్‌ హోటల్‌ వెనుక సముద్ర స్నానానికి దిగాడు. పెద్ద అల యువరాజ్‌ను సముద్రం లోనికి నెట్టేసింది. అతన్ని రక్షించే అవకాశం లేకుండాపోయింది. స్నేహితులు మూడో పట్టణ పోలీసులకు ఫిర్యాదు చేశారు. సి.ఐ. కోరాడ రామారావు ఆధ్వర్యంలో ఎస్‌.ఐ రాము గజ ఈతగాళ్ల ద్వారా గాలింపు చర్యలు చేపడుతున్నారు. రాత్రి 10 గంటల వరకు జాడ తెలియలేదు.