ఆధార్‌ క్లోనింగ్‌తో ఖాతాలో నగదు మాయం

చింతలపూడి పట్టణం, న్యూస్‌టుడే: ఆధార్‌ క్లోనింగ్‌ ద్వారా గుర్తు తెలియని వ్యక్తులు ఓ వ్యక్తి ఖాతా నుంచి రూ.30వేలు మాయం చేసినట్లు ఎస్సై హరికృష్ణ శనివారం తెలిపారు.  ఆయన కథనం మేరకు.. చింతలపూడి మండలం రాఘవాపురం గ్రామానికి చెందిన మాటూరి నరసింహారావు అనే ఉపాధ్యాయుడు తన చరవాణిలోని ఓ బ్యాంకు యాప్‌ ద్వారా నగదు నిల్వలు పరిశీలించారు. ఆ సమయంలో ఖాతా నుంచి రూ.30 వేలు నగదు తీసినట్లు ఉండటంతో బ్యాంకు అధికారులను సంప్రదించారు. ఆన్‌లైన్లో ఆధార్‌ క్లోనింగ్‌ ద్వారా గుర్తుతెలియని వ్యక్తులు  అపహరించినట్లు చెప్పడంతో బాధితుడు పోలీసులకు ఫిర్యాదు చేశారు. కేసు నమోదు చేసి దర్యాప్తు చేస్తున్నట్లు ఎస్సై పేర్కొన్నారు.