Vizag: విశాఖలో ఓట్ల తొలగింపు.. 10 మంది వైకాపా బీఎల్‌ఏలపై కేసు

విశాఖపట్నం: నగరంలో ఓట్ల అక్రమాలపై ఎమ్మెల్యే గణబాబు ఫిర్యాదుతో ఎన్నికల సంఘం చర్యలకు ఉపక్రమించింది. గతేడాది అక్టోబరు 27న విడుదల చేసిన ముసాయిదా జాబితాలో కొన్ని ఓట్లు తొలగించాలని దాదాపు 163 మంది ఒకటికి మించి ఫారం-7లు దాఖలు చేశారు. దాదాపు 5 వేల ఓట్లు రద్దు చేయాలని ఆన్‌లైన్‌లో దరఖాస్తు చేశారు. ప్రతిపక్ష పార్టీల ఓట్లు తొలగించాలని ఈఆర్వోపై ఒత్తిడి తెచ్చారు. వైకాపా నాయకులే ఓట్లు తొలగించినట్టు విశాఖ పశ్చిమ ఎమ్మెల్యే గణబాబు పరిశీలనలో వెల్లడైంది. వైకాపాకు చెందిన 10 మంది బీఎల్‌ఏలు నిబంధనలు ఉల్లంఘించి ఫారం-7లు సమర్పించినట్టు రిటర్నింగ్‌ అధికారి నిర్ధరించారు. దీంతో జిల్లా కలెక్టర్‌ ఆదేశాల మేరకు నాలుగు పోలీస్‌స్టేషన్లలో 10 మంది వైకాపా బీఎల్‌ఏలపై కేసు నమోదైంది. వీరిలో కొందరు వైకాపా పశ్చిమ ఇన్‌ఛార్జి అడారి ఆనంద్‌ కార్యాలయంలో పనిచేసే సిబ్బందిగా గుర్తించారు.