TS News: ఇసుక తవ్వకాలపై గనుల శాఖ కీలక నిర్ణయం

హైదరాబాద్‌: స్థానికులకు ఇసుక అందుబాటులో ఉండేలా నిబంధనలు కచ్చితంగా అమలు చేయాలని కలెక్టర్లను ప్రభుత్వం ఆదేశించింది. తమ ప్రాంతాల్లోని ఇసుకను ఇతర ప్రాంతాలకు తరలించకుండా.. అందుబాటులో ఉంచాలని గ్రామీణప్రాంతాల ప్రజల నుంచి విజ్ఞప్తులు అందడంతో కలెక్టర్లకు పరిశ్రమలు, గనులశాఖ ముఖ్య కార్యదర్శి బీఎండీ ఎక్కా ఉత్తర్వులు జారీ చేశారు. తెలంగాణ రాష్ట్ర ఇసుక మైనింగ్‌ నిబంధనలు -2015 కచ్చితంగా అమలు చేయాలని పేర్కొన్నారు. ఇసుక తవ్వకాలు, రవాణా, స్థానికంగా అందుబాటులో ఉంచడం, ఇళ్ల నిర్మాణ పథకాలకు ఉచితంగా సరఫరా వంటి నిబంధనలు అమలు చేయాలని స్పష్టం చేశారు. ఉల్లంఘనలు జరిగితే అధికారులపై చర్యలు తీసుకుంటామని స్పష్టం చేశారు.