Kakinada: కాకినాడలో దారుణం.. విద్యార్థినుల జడలు కత్తిరించిన ఉపాధ్యాయురాలు

కాకినాడ: తూర్పుగోదావరి జిల్లా కాకినాడలో దారుణం చోటు చేసుకుంది. ఓ ఉపాధ్యాయురాలు విద్యార్థినుల జడలు కత్తిరించిన ఘటన కలకలం రేపింది. దీనిపై స్పందించిన ఉన్నతాధికారులు చర్యలు చేపట్టారు. వివరాల్లోకి వెళితే.. కాకినాడ సూర్యనారాయణపురంలోని సర్వేపల్లి రాధాకృష్ణ మున్సిపల్‌ పాఠశాలలో పనిచేస్తున్న ఉపాధ్యాయురాలు మంగాదేవి.. విద్యార్థినుల వ్యక్తిగత శుభ్రత, వస్త్రధారణ విషయంలో కఠినంగా వ్యహరించారు. 

టీచరు మాటలు ఖాతరు చేయకుండా 9వ తరగతి చదువుతున్న 8 మంది విద్యార్థులు జుట్టు విరబూసుకుని పాఠశాలకు వచ్చారు. దీంతో ఆగ్రహించిన ఉపాధ్యాయురాలు మంగాదేవి.. బాలికల జడలు కత్తించారు. ఈ ఘటనపై విద్యార్థినుల తల్లిదండ్రులు ఆందోళన చేయడంతో మండల విద్యాశాఖ అధికారులు స్పందించారు. బాధితుల నుంచి వాంగ్మూలం తీసుకొని ఉన్నతాధికారులకు నివేదిక అందజేశారు. స్పందించిన జిల్లా విద్యాశాఖ అధికారులు శాఖాపరమైన చర్యల్లో భాగంగా ఉపాధ్యాయురాలు మంగాదేవిని సస్పెండ్‌ చేస్తూ ఉత్తర్వులు జారీ చేశారు.