Revanth reddy: చుక్కా రామయ్యను కలిసిన సీఎం రేవంత్‌రెడ్డి

హైదరాబాద్‌:  ప్రముఖ విద్యావేత్త, మాజీ ఎమ్మెల్సీ చుక్కా రామయ్యను తెలంగాణ సీఎం రేవంత్‌ రెడ్డి కలిశారు. రామయ్య కొంత కాలంగా అనారోగ్యంతో బాధపడుతుండటంతో గురువారం సాయంత్రం విద్యానగర్‌లోని ఆయన నివాసానికి వెళ్లి పరామర్శించారు. ఆరోగ్య పరిస్థితి గురించి ఆయన పెద్ద కుమార్తె ఉమను అడిగి తెలుసుకున్నారు. అనంతరం రామయ్యను శాలువాతో సన్మానించిన సీఎం.. జూన్‌ 2న తెలంగాణ రాష్ట్ర అవతరణ వేడుకలకు రావాలని ప్రత్యేకంగా ఆహ్వానించారు. తమ పాలన ఎలా ఉందో చెప్పాలని అడిగిన సీఎం.. ఏవైనా సలహాలు, సూచనలు ఇవ్వాలని ఈ సందర్భంగా కోరారు. విద్యారంగం సహా పలు అంశాలపై కాసేపు చర్చించినట్లు సమాచారం. అలాగే, ఎమ్మెల్సీగా ఉన్న సమయంలో రామయ్యతో తనకున్న అనుబంధాన్ని సీఎం గుర్తు చేసుకున్నారు. సీఎం వెంట మల్లు రవి, ఎమ్మెల్సీ మహేశ్‌ కుమార్‌ గౌడ్‌, ప్రభుత్వ సలహాదారు వేం నరేందర్‌రెడ్డి, స్థానిక కాంగ్రెస్‌ నేతలు ఉన్నారు.