Hyderabad: టీఎస్‌పీఎస్సీ వద్ద ఆందోళన కేసు.. అశోక్‌కు బెయిల్

హైదరాబాద్‌: టీఎస్‌పీఎస్సీ కార్యాలయం వద్ద ఆందోళన కేసులో అరెస్టు అయిన కోచింగ్ సెంటర్ నిర్వాహకుడు అశోక్‌కు బెయిల్ మంజూరు అయ్యింది. గ్రూప్-2 పరీక్ష వాయిదా వేయాలని అభ్యర్థులను రెచ్చగొట్టి టీఎస్‌పీఎస్సీ భవనం వద్ద ఆందోళన చేయించాడని ఆయణ్ని పోలీసులు అరెస్టు చేసిన సంగతి తెలిసిందే. వాట్సప్‌తోపాటు పలు సామాజిక మాధ్యమాల్లో టీఎస్‌పీఎస్సీ భవనం వద్దకు లక్ష మంది రావాలని అశోక్‌ పిలుపునిచ్చారని పోలీసులు తెలిపారు. ఈ మేరకు ఆందోళన జరిగిన రోజే అశోక్‌ను అరెస్టు చేసిన బేగంబజార్‌ పోలీసులు జైలుకు తరలించారు. తాజాగా అశోక్‌కు నాంపల్లి కోర్టు షరతులతో కూడిన బెయిల్‌ మంజూరు చేసింది. రెండు నెలల పాటు ప్రతి గురువారం బేగంబజార్ ఠాణాలో సంతకం చేయాలని ఆదేశించింది.