Delhi: మద్యం కుంభకోణం కేసు.. 3వేల పేజీల ఛార్జిషీట్‌ దాఖలు చేసిన ఈడీ

దిల్లీ: దేశవ్యాప్తంగా సంచలనం సృష్టించిన దిల్లీ మద్యం కుంభకోణం కేసులో ఎన్‌ఫోర్స్‌మెంట్‌ డైరెక్టరేట్‌ (ఈడీ) తొలి ఛార్జిషీట్‌ దాఖలు చేసింది. మూడు వేల పేజీల ఛార్జిషీట్‌ను దిల్లీ రౌస్‌ అవెన్యూలోని ప్రత్యేక న్యాయస్థానానికి సమర్పించింది. ప్రస్తుతానికి ఇండో స్పిరిట్‌ యజమాని సమీర్‌ మహేంద్రుని నిందితుల జాబితాలో చేర్చిన ఈడీ.. మిగిలిన నిందితులపై త్వరలో ఛార్జిషీట్‌ దాఖలు చేస్తామని తెలిపింది. ఈ కేసుపై విచారణ ఇంకా కొనసాగుతోందని స్పష్టం చేసింది. ఈ సందర్భంగా డాక్యుమెంట్ల సంఖ్య ఎక్కువగా ఉందని ప్రత్యేక కోర్టు వ్యాఖ్యానించింది. దీనిని పరిగణనలోకి తీసుకునేందుకు సమయం పడుతుందని పేర్కొంది.

మరోవైపు ఇదే కేసుపై దర్యాప్తు చేపడుతున్న సీబీఐ కూడా నిన్న తొలి ఛార్జిషీట్‌ దాఖలు చేసిన విషయం తెలిసిందే. ఏడుగురిని నిందితులుగా చేరుస్తూ సుమారు 10 వేల పేజీల ఛార్జిషీట్‌ను రౌస్‌ అవెన్యూలోని ప్రత్యేక కోర్టులో సమర్పించింది. వీరిలో హైదరాబాద్‌కు చెందిన వ్యాపారి బోయినపల్లి అభిషేక్‌, ఇండియా ఏహెడ్‌ అధినేత ముత్తా గౌతమ్‌ కూడా ఉన్నారు. అయితే, సీబీఐ ఆగస్టు 17న నమోదు చేసిన ఎఫ్‌ఐఆర్‌లో ఏ1గా ఉన్న దిల్లీ ఉప ముఖ్యమంత్రి మనీశ్‌ సిసోదియా పేరు సీబీఐ ఛార్జిషీట్‌లో గానీ, తాజాగా ఈడీ దాఖలు చేసిన ఛార్జిషీట్‌లో గానీ లేకపోవడం గమనార్హం.