Old Age: తాతా బామ్మా..మీరు ఏం తినాలో తెలుసా..? ఈ జాగ్రత్తలు తీసుకోండి..!

ఇంటర్నెట్‌ డెస్క్‌: ఇపుడు వృద్ధాప్యం అంటే 70 ఏళ్లు దాటినవారే..ఈ విషయాన్ని ఆరోగ్య సంస్థలు కూడా పేర్కొంటున్నాయి. ఈ వయసులో పోషకాహారం తీసుకుంటే పదికాలాల పాటు హాయిగా ఉండొచ్చు..వయసులో ఉన్నట్టుగా వృద్ధాప్యంలో ఏం తిన్నా సరిగా జీర్ణం కాదు. తినాలన్నా కోరిక ఉన్నా తినే ఓపిక ఉండదు. దానికి తోడూ ఆహారం సమతులంగా తీసుకోకపోవడంతో ఇబ్బందికర పరిస్థితులు ఏర్పడుతాయి. అనారోగ్యం కూడా ఓ కారణంగా ఉంటోంది.  అందుబాటులో ఉన్న ఆకు, కూరగాయలను పద్ధతిగా తీసుకుంటే జీర్ణ వ్యవస్థకు ఇబ్బందులుండవని పోషకాహార నిపుణురాలు డాక్టర్‌ అంజలీదేవి పలు విషయాలు తెలిపారు.

ఎలాంటి ఆహారం తీసుకోవాలంటే...

* ఆహారం ఎలా తీసుకోవాలో జాతీయ పోషకాహార నిపుణులు ఒక సూచన చేశారు. రోజులో పళ్లెంలో ఏం ఉండాలో తెలిపారు. సగం ప్లేట్‌లో ఆకుకూరలు, పండ్లు, పచ్చకూరలు, దుంపలు కొంచెం ఉండాలి. పావువంతు గింజ ధాన్యాలు, మరో పావువంతు మాంసకృతులుండాలి.

* ప్రతి రోజూ ఏదో ఒక ఆకుకూర 100 గ్రాములు తినాలి. ఇనుము, కాల్షియం లభిస్తాయి.

* పండ్లలో బి కాంప్లెక్సు ఎక్కువగా ఉంటుంది. ఇది నరాల బలహీనతలను నివారిస్తుంది.

* గింజధాన్యాలు ఎక్కువగా తింటే..దుంపలు తక్కువగా తినాలి. ఈ రెండింటిలో ఇంధనమే ఉంటుంది. వృద్ధాప్యంలో పని చేయలేరు. అందుకే వీళ్లు తక్కువగా తీసుకోవాలి.

* పాలు, పాల పదార్థాలను ఎక్కువగా తీసుకోవాలి. రోజూ ఒక గ్లాసు పాలు తాగితే మరీ మంచిది.

* తీపి పదార్థాలు, ఫ్రైలు ఎక్కువగా తినొద్దు. ఫాస్ట్‌ఫుడ్‌ తినడానికి మొగ్గు చూపొద్దు. ఎందుకంటే మధుమేహం, బీపీ ఉంటుంది కదా..!

* వయసుకు తగ్గ వ్యాయామం చేయాలి. కొంచెం కొంచెం ఎక్కువగా తీసుకోవాలి. రాగి జావ తాగాలి. అవసరమైతే విటమిన్‌ సప్లిమెంట్లను వైద్యుల సలహాతో వేసుకోవాలి. విటమిన్‌ డి వారానికి ఒకటి వేసుకుంటే కాళ్లనొప్పులు తగ్గిపోతాయి. నీటిని ఎక్కువగా తాగాలి.