Kadapa: యోగి వేమన వర్సిటీ హాస్టల్‌లో ఫుడ్ పాయిజన్.. 30 మందికి అస్వస్థత

కడప (నేర వార్తలు): కడపలోని యోగి వేమన విశ్వవిద్యాలయం వసతి గృహంలో ఫుడ్‌ పాయిజన్‌ అయింది. దీంతో 30 మంది విద్యార్థులు అస్వస్థతకు గురయ్యారు. బుధవారం జరిగిన ఈ ఘటన ఆలస్యంగా వెలుగులోకి వచ్చింది. యూనివర్సిటీ అధికారులు రాత్రికి రాత్రే గుట్టుచప్పుడు కాకుండా వారిని ప్రభుత్వ ఆస్పత్రికి తరలించారు. కొంతమంది పరిస్థితి ఆందోళనకరంగా ఉండటంతో వారిని నగరంలోని ఓ ప్రైవేటు ఆస్పత్రికి తీసుకెళ్లారు. బుధవారం రాత్రి విద్యార్థులు వంకాయ కూర, రసంతో అన్నం తిన్నారు. ఆ తర్వాత వారికి వాంతులు, విరేచనాలు కావడంతో హుటాహుటిన ఆస్పత్రికి తరలించారు. ఫుడ్ పాయిజన్‌కు గల కారణాలను అధికారులు పరిశీలిస్తున్నారు. విద్యార్థి సంఘం నాయకులు ఆస్పత్రికి వెళ్లి పరామర్శించారు.