Tirupati: ఆర్టీసీలో అత్యాధునిక మోసం

అద్దె బస్సుల డ్రైవర్లకు టిమ్‌ల అప్పగింత
హైటెక్‌ టెక్నాలజీతో టికెట్ల మార్పిడి

తిరుపతి (ఆర్టీసీ), న్యూస్‌టుడే: ఆర్టీసీలో అత్యాధునిక మోసం బయటపడింది. అద్దె బస్సుకు చెందిన ఓ డ్రైవర్‌ ఆర్టీసీ కంప్యూటరైజ్డ్‌ బస్సు టికెట్లను, నకిలీ టికెట్లుగా తయారీ చేసి, ప్రయాణికులకు విక్రయించి సొమ్ము చేసుకుంటున్న ఘటన ఆలస్యంగా వెలుగులోకి వచ్చింది. గుర్తించిన అధికారులు వైఎస్‌ఆర్‌ కడప జిల్లా ప్రొద్దుటూరుకు చెందిన డ్రైవర్‌ ఎం.సురేష్‌బాబును విచారిస్తున్నారు.

తిరుమల- తిరుపతి మధ్య 50, తిరుమల- రేణిగుంట విమానాశ్రయం మధ్య 10, తిరుపతి- మదనపల్లె 6, తిరుపతి- నెల్లూరు 8, తిరుపతి- కడప 8, తిరుపతి- శ్రీకాళహస్తి 3 మొత్తం 85 విద్యుత్తు బస్సులు నడుస్తున్నాయి. ఆదాయాన్ని ఆర్టీసీ తీసుకొని, కి.మీ. చొప్పున గుత్తేదారు సంస్థకు చెల్లిస్తోంది. డ్రైవర్లకు టిమ్‌లు అప్పగించడంపై విమర్శలు వినిపిస్తున్నాయి. సాధారణ అద్దె బస్సుల్లో ఆర్టీసీ కండక్టర్లలా వీటిల్లో ఎందుకు ఏర్పాటు చేయలేదన్న ప్రశ్నలున్నాయి. డ్రైవర్ల కొరతతో ఎవరు దొరికితే వారిని గుత్తేదారు సంస్థ నియమించుకుని, శిక్షణ ఇవ్వకుండా ప్రయాణికుల ప్రాణాలను పణంగా పెడుతోంది. తిరుమల కనుమదారిలో, నెల్లూరు, మదనపల్లె మార్గాల్లో అతివేగంగా బస్సులు నడుపుతున్నారని పలువురు ఆరోపిస్తున్నారు. ఆర్టీసీ ఆదాయం చూస్తుందే తప్ప, ప్రయాణికుల భద్రత చూడటం లేదని పలువురు ఆరోపిస్తున్నారు.

తనిఖీలు నిర్వహిస్తాం

- హరిబాబు, అలిపిరి డిపో మేనేజర్‌

నకిలీ టికెట్ల ఘటనతో అప్రమత్తమై నిరంతరం తనిఖీలు నిర్వహిస్తున్నాం. డ్రైవర్లకు హెచ్చరిక జారీ చేశాం.