కంప్యూటర్‌ సైన్స్‌ చదివే వారికి గూగుల్‌ గుడ్‌న్యూస్‌.. 1000 డాలర్లు స్కాలర్‌షిప్‌ పొందే అవకాశం

ఇంటర్నెట్‌ డెస్క్‌: కంప్యూటర్‌ సైన్స్‌ను కెరీర్‌గా ఎంచుకునే అమ్మాయిలకు అభ్యర్థులకు గూగుల్‌ సదావకాశం కల్పిస్తోంది. కంప్యూటర్‌ సైన్స్‌లో డిగ్రీ చేసే విద్యార్థినులకు జనరేషన్‌ గూగుల్‌ స్కాలర్‌షిప్‌ కార్యక్రమం కింద స్కాలర్‌షిప్‌ అందిస్తోంది. ఈ స్కాలర్‌షిప్‌నకు ఎంపికైన వారు 2022-23 విద్యా సంవత్సరానికి గానూ వెయ్యి డాలర్లు స్కాలర్‌షిప్‌ రూపంలో అందుకుంటారు.

చదువులో ప్రతిభతో పాటు వైవిధ్యం, వినూత్న ఆలోచనల ఆధారంగా ఈ స్కాలర్‌షిప్‌కు ఎంపిక చేస్తారు. అలాగే 2021-22 అకడమిక్‌ సంవత్సరంలో ఫుల్‌టైమ్‌ డిగ్రీ అభ్యసిస్తుండాలి. స్కాలర్‌షిప్‌ పూర్తయ్యేనాటికి ఏషియా, పసిఫిక్‌ దేశాలకు చెందిన గుర్తింపు పొందిన విశ్వవిద్యాలయంలో రెండో ఏడాది డిగ్రీ చదువుతుండాలి. అర్హత కలిగిన అభ్యర్థులు తమ టెక్నికల్‌ ప్రాజెక్టులను పేర్కొంటూ రెజ్యుమె/ సీవీని రూపొందించాలి. 400 పదాలకు తగ్గకుండా ఆంగ్లంలో రాసిన వ్యాసాన్ని పంపాల్సి ఉంటుంది. డిసెంబర్‌ 10లోపు స్కాలర్‌షిప్‌ కోసం దరఖాస్తు చేసుకోవాలి. పూర్తి వివరాలకు గూగుల్‌ వెబ్‌సైట్‌ను సందర్శించండి.