Tirumala: మాండౌస్‌ ప్రభావంతో తిరుమలలో భారీ వర్షాలు.. గరిష్ఠ స్థాయికి జలాశయాలు

తిరుమల: మాండౌస్‌ తుపాను ప్రభావంతో తిరుమలలో విస్తారంగా వర్షాలు కురుస్తున్నాయి. ఎడతెరిపి లేకుండా కురుస్తున్న వర్షాలకు శ్రీవారి కొండ తడిసి ముద్దయింది. కొండచరియలు విరిగిపడే ప్రమాదం ఉన్న ప్రాంతాల్లో భక్తుల రాకపోకలను తిరుమల తిరుపతి దేవస్థానం (తితిదే) నిలిపివేసింది. పాపవినాశనం, శిలాతోరణం మార్గాలను తితిదే మూసివేసింది. భారీ స్థాయిలో కురుస్తోన్న వర్షాలకు తిరుమలలోని అన్ని జలాశయాలు గరిష్ఠ స్థాయికి చేరుకుంటున్నాయి. తిరుమలలోని ఏఎన్‌సీ ప్రాంతంలో భారీ వృక్షం విరిగిపడడంతో అక్కడే విధులు నిర్వహిస్తోన్న పారిశుద్ధ్య కార్మికురాలు స్వల్పంగా గాయపడ్డారు. ఆమెను వెంటనే అశ్విని ఆస్పత్రికి తరలించారు. వృక్షాన్ని తొలగించేందుకు తితిదే అధికారులు చర్యలు తీసుకున్నారు.  శ్రీవారి మెట్టు మార్గం గుండా తిరుమలకు నడిచి వెళ్లే భక్తులను తితిదే అనుమతించడంలేదు.