Kaleshwaram: కాళేశ్వరం ఆనకట్టలపై ఫిర్యాదులు, నివేదనలు కోరుతూ ప్రకటన జారీ

హైదరాబాద్‌: కాళేశ్వరం ఎత్తిపోతల్లోని బ్యారేజీలపై  ప్రజల నుంచి జస్టిస్‌ పీసీ ఘోష్‌ కమిషన్‌ ఫిర్యాదులు, నివేదనలు కోరింది. ఈ మేరకు నీటిపారుదలశాఖ కార్యదర్శి రాహుల్‌ బొజ్జా బహిరంగ ప్రకటన జారీ చేశారు. మేడిగడ్డ, అన్నారం, సుందిళ్ల ఆనకట్టలకు సంబంధించిన అంశాలపై కమిషన్‌కు సాక్ష్యాధారాలతో అఫిడవిట్లు సమర్పించవచ్చని తెలిపారు. బీఆర్కే భవన్‌ వద్ద ఏర్పాటు చేసిన పెట్టెలో ఫిర్యాదులు, నివేదనలు దాఖలు చేసేందుకు మే 31 వరకు గడువు ఇచ్చారు. పోస్టు ద్వారా కూడా ఫిర్యాదులు పంపేందుకు అవకాశం కల్పించారు. తగిన సాక్ష్యాలు, ప్రమాణ పత్రంలేని అఫిడవిట్లు తిరస్కరణకు గురవుతాయని స్పష్టం చేశారు.