TSPSC ఛైర్మన్‌ రాజీనామా.. సీఎం రేవంత్‌ను కలిసిన కాసేపట్లోనే..!

హైదరాబాద్‌: టీఎస్‌పీఎస్సీ (TSPSC) ఛైర్మన్‌ పదవికి జనార్దన్‌ రెడ్డి (Janardhan Reddy) రాజీనామా చేశారు. ముఖ్యమంత్రి రేవంత్ రెడ్డిని కలిసిన కొద్దిసేపటికే ఛైర్మన్‌ పదవికి ఆయన రాజీనామా చేయడం గమనార్హం. రాజీనామాకు ముందు బోర్టుకు సంబంధించిన వివిధ అంశాలపై చర్చించినట్లు సమాచారం. ఆ తర్వాత గవర్నర్‌ తమిళిసైకి జనార్దన్‌ రెడ్డి రాజీనామా సమర్పించారు. దాన్ని గవర్నర్‌ ఆమోదించాల్సి ఉంది. 

కాగా, 2021 మే నెలలో TSPSC ఛైర్మన్‌గా జనార్దన్‌ రెడ్డి నియమితులయ్యారు. ఇటీవల టీఎస్‌పీఎస్సీ గ్రూప్‌ - 1 పేపర్‌ లీకేజీ, పలు పరీక్షల నిర్వహణకు సంబంధించిన అంశాలపై టీఎస్‌పీఎస్సీపై పెద్ద ఎత్తున విమర్శలు వచ్చాయి. కమిషన్‌ను ప్రక్షాళన చేయాలని, ఛైర్మన్‌ పదవికి జనార్దన్‌ రెడ్డి రాజీనామా చేయాలనే డిమాండ్లు సైతం వినిపించిన విషయం తెలిసిందే.